牛大人嚟咗香港咁耐，一直都好難book位，所以我一直都想試，但未試到。但今日係同男朋友嘅紀念日，做到嘢嘅佢竟然book到牛大人。 首先梗係嗌咗佢兩個招牌湯底先，一個係麻辣鍋一個係紅燒牛肉鍋，開始打邊爐之前我好奇地試咗兩啖湯，佢呢兩個湯底我都覺得好整，麻辣嗰個又麻又辣夠晒層次，個牛肉鍋都好香牛肉味，而且大少少甜，真係好似出邊食牛肉麵嘅湯底一樣。 話晒都係紀念日梗係食過最貴嘅餐啦，不過其實貴極個性價比都好高，$300唔使一位，就已經食到和牛。佢呢個和牛肩肉好夠牛味，肉質都好腍，唔會煮耐左就老晒。 但我最鍾意嘅係佢個手切封門柳，因為佢係厚切但係亦都非常之腍，啲肉都夠滑。 另外我哋仲試埋佢個和牛牛丸，好香嘅牛脂味道，而且成粒丸都好爽口彈牙。 而另一樣特別嘅嘢就係佢個牛胸爽，雖然睇落好似成篇都係肥膏，但係食落係爽口嘅，一啲都唔膩。 而另一樣我覺得好好味嘅係佢嘅鯛魚片，通常會用呢種魚來做刺身，但係原來攞嚟打邊爐一樣咁鮮甜。 而食麻辣鍋又點可以冇鴨血，佢呢度嘅鴨血係另外一種小食唔係包係麻辣鍋入邊，所以我嫌佢嘅味道比較淡，不過只要擺埋落去麻辣鍋嗰邊煮一陣，就會索晒味。 另外呢度除咗我鍾意嘅墨魚滑之外仲有好多其他嘅滑，其中我就試咗個墨汁墨魚，八爪魚珍珠滑，牛肉滑同普通墨魚滑。四隻滑都係好彈牙，而且都會有墨魚肉或者牛肉喺入邊，令到口感好豐富，不過味道就會帶有少少甜味。 喺出去攞醬料嘅時候我見到佢有滷牛肉汁可以俾你送飯，因為平時滷肉飯就食得多，滷牛肉飯就未試過。佢個滷牛肉汁都真係好香牛味，配埋個飯真係不得了。 飲品方面呢度有好多自家製嘅台式茶，我自己就最鍾意佢個白桃烏龍，因為係無糖之餘但又會飲到白桃嘅味道。 另外佢呢度有款啤酒叫做流水落花，因為佢個名咁特別，所以我又叫左嚟試下。佢嘅麥味唔會好重，好易入口，又有淡淡花香，都幾岩女仔飲。 去到差唔多時間買單嘅時候，佢會俾埋一張甜品紙你，入邊會有幾款唔同嘅雪糕同埋仙草凍。我自己就揀咗個仙草凍，入邊有好多唔同嘅配料，呢一餐就係呢個豐富嘅甜品之下圓滿地結束。牛大人台灣火鍋吃到飽 (大鴻輝(荃灣)中心)地址: 荃灣眾安街55號大鴻輝(荃灣)中心16樓
