朋友話好耐冇一齊食飯，約咗我哋一齊去食韓國嘢。呢間韓國嘢嘅食物都好地道，雖然唔係啲乜嘢特別嘅精緻菜式，但係味道就好唔錯。 坐低冇耐職員就上咗一碟必備嘅泡菜同埋三款前菜，不過味道就唔係好辣，可能因為要就番香港人嘅口味啦。 我最近好鍾意食蛋卷，見到佢有韓式蛋卷所以就叫嚟試吓，佢嘅蛋捲入邊包左啲蟹子，令到個口感更加豐富。 另外見到一個叫做排骨餃子，因為好好奇佢入邊係咪真係包住排骨，所以就叫咗嚟試吓。 嚟到之後我諗係韓文譯中文嘅關係，入邊真係冇排骨㗎。但係餃子入邊就有滿滿嘅肉，所以個餃子都好鮮甜。 其中一樣韓國必食嘅食物就係紫菜飯卷，我哋揀咗個牛肉味，佢呢個紫菜飯卷好足料，味道比較清，都幾好味嘅。 而另一樣必食嘅韓國食物就係炸雞，我哋揀咗佢個原味炸雞，就咁睇好似冇乜特別。 但係一咬開就好juicy，佢啲炸粉唔會好厚，而且好鬆脆，好食過炸雞專門店。 最後就係今晚嘅重頭戲，蟹鍋。佢一個鍋入邊有兩隻蟹，兩隻都有滿滿嘅膏。不過我自己覺得個湯超好飲，因為個湯有晒蟹嘅鮮甜味，亦都有菜嘅新鮮味道。泡菜湯底上面係西洋菜下邊就鋪滿芽菜，所以索晒泡菜湯嘅味道，辣辣地，幾好味。 四個人食為返每個人都係二百零蚊，食韓國嘢嘅話都係差唔多呢個價錢。👉🏼ChumChum味地址: 尖沙咀麼地道37-41號港匯廣場17-20 & 31-34地下
