好耐冇食過西餐，今日收工去開太子，就去酒吧街果邊搵嘢食。呢間環境唔錯，嘢食更加係超水準。 見到佢個餐牌有個小食叫手搖炸雞，台式手搖飲品就飲得多，但雞又點樣手搖法呢？！所以叫左嚟試下。半隻雞都有六件，份量好足夠。 而手搖嘅意思係好似shake shake薯條咁，俾調味粉周紙袋你自己shake。呢個食雞方式都幾新穎，唔錯，想食幾辣幾咸都可以自己揀。 我地揀左一個麻辣粉，一個咖喱粉。麻辣粉真係辣左小小，所以唔洗落太多。而個咖喱粉就好香，咖辣嘅。最重要嘅係啲雞肉好滑，咬開好juicy，啲粉亦都唔厚，好好味。 然後我地一人再叫多左個主食，然後加左餐湯同飲品。今晚嘅餐湯係南瓜湯，好濃，甜甜地，唔錯。 主食之一係炭燒牛柳，佢個牛柳一上嘅時候，表面好乾身，你完全唔會想像到切開後帶嚟嘅驚喜。而佢呢度仲有樣特別嘅地方係，一般伴碟都係薯條薯蓉，但係呢度用嘅係蕃薯乾，脆卜卜，甜甜地，幾好食。 講返個牛柳，一切開係爆汁，佢地煎嘅時候，完完全全將牛柳嘅肉汁鎖晒喺入邊，所以牛柳好嫩好冧，真係不得了，加埋佢個蒜蓉汁，簡直係絕。 另一個主食係黑豚肉，呢個我地加左個牛油炒雜菌，佢啲雜菌好香，味道都好夠。 同樣地，黑豚肉一切開又係爆汁，啲肉好嫩而且係彈牙嘅，而且仲食到肉嘅鮮甜味，加埋佢個黑椒汁唔太辣，都係好正。.食完我地兩個都飽到需要散下步先，埋單700個大洋有咁嘅質素，我覺得係好值，因為佢三樣嘢食都好有水準。.👉🏼Chapter 3 Steak Bar & Restaurant地址: 太子花園街232-234號地下J號舖
