每日返工，忙碌一大餐，最期待嘅就係收工之後同男朋友食好西。今日近近地，揀咗一間北角附近嘅餐廳。 本身好鍾意食魚麵嘅我，知道呢度開咗一間專食魚麵、同魚製品嘅餐廳，當然要嚟試一試。 佢哋啲侍應好Nice，一坐低就簡而精地介紹咗佢哋部份菜式，超深刻印象嘅係，佢哋嘅魚麵係用咗50%以上嘅魚肉製成，澱粉質少好多，一向怕肥嘅我即刻安心晒🤣 主食我哋叫咗黑白鴛鴦春卷湯魚麵同埋麻辣鴨絲撈魚麵，佢哋啲魚面真係同出邊唔同，入口爽滑彈牙，好明顯食到有大量魚肉喺入邊，超級彈牙。出面啲魚麵，好多都冇辦法煮到入味，但佢哋嘅厲害之處，我諗就係個湯唔需要好濃，但一樣好入味，配白雪雪魚湯，清清地非常香。魚春卷同埋墨魚春卷，亦都非常特別，以為放喺湯度會變到好林，但食落其實味道好好。 而鴨絲都好出色，一啲都唔老，撈勻食辣辣地非常滋味。 我哋仲叫咗魚湯翡翠苗，佢哋啲豆苗好新鮮，而且唔會煮過頭，食落好Fresh而且冇渣，加埋個魚湯湯底，真心非常好食。 另外我哋仲叫咗佢哋嘅特色菜式-炸魚狗腸，呢個模仿熱狗腸嘅菜式，係用魚肉製成，味道好新鮮，調味配料非常出色，我諗真係攞嚟做熱狗都會好唔錯。 其次，我哋仲嗌左蒜爆牛油雞翼、炸魚無薯條，同樣地都好出色。 特別係炸魚無薯條，佢哋係用100%魚肉製成，入邊冇任何薯仔㗎，口感好特別，加埋雙子醬，真係未食過呢種薯條！ 飲品方面，叫咗個桂花雪梨綠茶，桂花味好香，亦都飲到雪梨嘅味道，口感清新，下次一定要試埋其他。 呢間餐廳嘅食物，真係非常有特色，主打魚製品，而且價錢非常貼地，絕對值得一食再食。另外，只要買左佢地個環保餐盒，之後嚟買外賣仲可以減3蚊添，見到佢哋啲下午茶都好吸引，有機會一定要去食埋佢😋.👉🏼魚事者地址: 北角炮台山宏安道14-28號威德閣地下14號舖
