2019石垣島自駕遊Vlog石垣島自駕遊Day 2 ～ Like&Share 今次嘅石垣島之旅帶埋媽咪去，所以每日行程唔會安排太多，而且我地都係睇天氣而決定第2日嘅行程，每日都會盡量早些返酒店休息。 未出發前日日睇住天氣預測，預測話會多雲有雷雨，所以都有定心理準備！但一落機見到藍天白雲，真係好開心 由機場去日產攞車都係廿分鐘搞掂晒⋯⋯攞左車第一件事去醫肚，去左兩間出名嘅食堂都食閉門羹！最後隨便揀間cafe 食，cafe只有豬軟骨八重山面同埋牛丼，味道就普普通通啦，最緊要醫飽阿媽個肚！食飽飽出發去「平久保崎燈台」，眼前個景真係好靚，碧藍嘅海水，加上遊客唔多，可以慢慢欣賞同影相，好正（自駕遊好處，影相可以影到靚為止） 第一日由機場北上睇完兩個景點就番酒店，呢間酒店新開左未夠一年，唔近海邊但近港口，唔係resort，但勝左價錢平，步行唔使兩分鐘就有family mart 同燒肉店，樓下有parking lot，好方便！ 最後燒肉有無伏 我地先叫左三碟唔同部位嘅牛肉嚟試。 牛嘅部位講完都唔記得，睇落亦都好相似。食落牛味唔錯亦唔會太重牛味或騷味。唔同部位肉質都一樣咁鮮嫩。唯一一樣唔好嘅係， 佢哋喜歡係肉上面加左d醬汁， 變咗唔能夠百份百嚐到牛肉嘅鮮味。其實靚嘅牛肉， 只係加少少鹽就ok, 實在唔使加醬汁。 整體嚟講， 都係高質同埋抵食。 所以真係唔一定要去一啲人氣長龍店，去小店反而有驚喜。途中經過cafe 地址： Cafe-marina-da 日本, 〒907-0332 Okinawa-ken, Ishigaki-shi, Ibaruma, 231-12焼肉 彦 地址： 日本〒907-0013 Okinawa-ken, Ishigaki-shi, Hamasakichō, 2-chōme−3-232019石垣島自駕遊Day 2- 竹富島大半日遊https://youtu.be/X90yMY5Qxi0 呢個島同石垣島最近，15分鐘船程就到。一般去竹富島會坐牛車，踩單車，但老媽子年紀大，雖然佢踩單車叻過我地，但怕佢唔小心跌親，牛車我地又唔想辛苦隻牛，所以我地就慢慢行，由港口行到西面嘅西棧橋同星之砂浜，全程行左4個半鐘左右，沿路無瓦遮頭，一定要搽足防晒，補完又補。 竹富島到處都會見到紅磚瓦頂嘅小屋，仲會成日見到「石敢當」嘅石碑，人唔多好寧靜！去到西棧橋，忍唔住要換番拖鞋落水浸下，落水見到好多黑色一條條嘅「海參」，好怕踩到佢地，步步為營，仲有好多藍色小魚... Kondoi 海灘好岩一家大細去玩水，水好清澈又唔深，加上無咩海浪！ 去到星砂浜，當然都要搵下星沙..阿女隨便拎起一撮沙就見到，年紀大老花真係要慢慢先搵到 最後系竹富島搵野食前一定要research一下時間，如果唔系就好似我地咁miss左食野時間，要出返石垣島先有得食。2019石垣島自駕遊Day3~浮潛日https://youtu.be/O2eJc1xu09A 天色唔算好，陰陰天，但無落雨已經好好！我地拎住張手寫紙，就喺約好左嘅東橫inn等，其實都好擔心會唔會去唔成架..1245...準時地見到浮潛公司嘅車，填寫完免責聲明等等資料，就開車跟住佢地去到碼頭，泊好車之後落船。參加者包括我地有15人左右，佢地開船前講解下將會幾耐到浮潛嘅地方，船上嘅設施等等！當然我地係聽唔明。個職員用佢嘅body language 加上少少英文單字，我地總算明白個流程 用左半個鐘左右就去到浮潛嘅地方。我地都好期待將會見d咩呢⋯⋯職員好細心照顧年紀大嘅媽媽，帶佢落水有扶住佢，游左陣仲帶左媽咪上返船，細心度5粒星 由於第一次浮潛，無經驗，對腳蛙下蛙下，望落水果刻..wow...好深呀！好驚驚（水深又唔識踩水係會慌慌地）但潛下潛下就習慣左。可能陰天嘅關係無左陽光折射，珊瑚嘅顏色睇落都唔係咁鮮豔。而魚和珊瑚又離我太地遠，影得唔太清楚。靚仔職員專登潛深少少幫我地影下video...而家睇番都要估下邊個係自己！ 浮潛左大約1個鐘左右，我地又番上船出發去幻之島。幻之島係一個退潮先會出現嘅沙丘，並唔系島，所以要退潮先可以行上去！我地去到嘅時候大約3點幾，玩左30分鐘左右我地就離開。藍天白雲真係可遇不可求，天陰陰嘅幻之島唔太靚，但特別在，腳底踩住嘅地方唔係海邊，而其實係海中心... 呢個膽粗粗報到名..又成行到嘅浮潛之旅，我地都好appreciate 職員照顧到每個細節。可能我地係需要「特別」（不諳日語+第一次玩）嘅待遇，overall 我地都好滿意佢地嘅service ...Like シュノーケリング＆マリンスポーツ専門店-ライズ石垣島2019石垣島自駕遊Day4~下雨天的川平灣https://youtu.be/hhBgRg9TGRs 朝早先開車去離酒店大約廿分鐘路程嘅Banna Park。沿斜路上公園嘅時候，車出面嘅景物同大霧時去飛鵝山無乜分別，霧好大，路又好斜，上到一半已經大雨。兜左個圈，落番山，見到想玩嘅長滾輪滑梯..但落雨濕濕玩唔到。如果天氣好，公園可以遠眺成個石垣島嘅山同海，景觀應該幾靚。 行左公園兜咗個「大運」之後，（公園有幾個入口，基本上有幾個入口都揸車兜左），又到lunch 時間。求其搵左間食丼飯嘅餐廳醫肚。牛肉普普通通，味道一般！食完lunch, 同行嘅最老最後生嘅見到落雨就返酒店休息，而我同三家姐梗係唔會匿喺酒店，按原來行程北上去川平灣同埋御神崎燈塔 沿79號公路會經過名藏濕地，落住雨都見到有人喺濕地到行。喺濕地附近有間賣菠蘿嘅小店。呢間小店網上都有介紹。女店員介紹兩種唔同嘅菠蘿，一種係Hawaiian Pineapple 另一種係Golden Pineapple。 價錢分別係300Yen同600Yen! 經試食後，我地買左平果隻，因為Golden 個隻菠蘿太甜！ 而Hawaiian 相對香d, 菠蘿味重d, 食落去無平時食果陣會口痕嘅感覺...話咁快.店員好熟手咁將原隻菠蘿切好晒一粒粒放入密實袋比我地沿路拮黎食，好fresh 買完菠蘿，再揸車多大約廿分鐘左右就到左川平灣。雨停左但仍然好天陰。我地去到無咩人嘅展望台，眼前見到川平灣嘅另一面：就喺天陰下仍然可見到唔同顏色，清晰透轍嘅海水。實在係另一種嘅美 去完川平灣，揸車十幾分鐘就去到御神崎燈塔。當時好大風，上樓梯行上燈塔嘅時候真係好似會被風吹跌，要扶實欄杆先上到去塔頂 整個下午就好悠悠閒閒揸車兜風咁，睇左兩個應該天晴會更靚嘅遊客景點後，我地又準備食燒肉晚餐。我哋今晚去嘅呢間餐廳係朝早親身去訂位。餐廳比到我地嘅時間係5點到7點半。食燒肉兩個半鐘， 其實有d 趕， 但我哋都明白舖頭細細，有限時嘅必要, 無所謂啦。呢間燒肉店面寫住石垣牛4級，當然睇表面係無第一日食嗰間石垣牛5級相比， 但係其實和牛去到第五級， 除咗牛肉d雲石紋油花再靚d之外， 其實肉味同咬口都及唔上低級d嘅和牛。 而且當脂肪更多嘅時候， 食落相對仲感覺得比較肥膩，所以我哋都覺得呢間石垣牛4級嘅小店牛肉比第一間更好食！ 食完燒肉，我地見有時間就去左西面嘅富崎海灘睇下日落，由於雲層太厚，無緣見到咸蛋黃西下嘅情景，唯有喺海灘慢慢行下當消化一下豐富嘅晚餐2019石垣島自駕遊Day5~米原浮潛https://youtu.be/SqQoyHQKiEY 行程最後一日我地揀左去米原海灘，天公造美，陽光普照，好天到我地曬到黑晒！呢個海灘水清但沙唔算好幼，一定要著番對拖鞋行。我地黎到海灘，原本諗住游下水算，但喺停車場見到有得租借浮潛用品，咁就即管試下玩！戴住goggle 嘅媽咪，終於夠膽耷個頭落水睇魚仔！一個70歲嘅老人家突然變左一個小朋友咁「嘩，好多魚仔呀..」，就係咁阿媽「浮浮沉沉」咁玩左陣！ 米原海灘有收費嘅停車場（500yen whole day),但亦都有人隨意泊車! 另外沖身嘅地方都係好簡陋，同埋好多蚊 前一日落雨，加上其餘三位同行成員無去到川平灣同燈塔，所以去完米原海灘我地又揸車重複帶佢地遊覽下，睇過下雨中嘅景色，亦都睇埋藍天白雲下嘅另一面，自駕就有呢個好處！ 最後一晚喺石垣島，我地無食牛嘞，去左食AGU 豬火鍋！ Agu豬好似好出名，但個人覺得同普通豚肉打邊爐差不多，可能我地唔識欣賞2019石垣島自駕遊Day5~米原浮潛https://youtu.be/SqQoyHQKiEY2019石垣島自駕遊Day4~下雨天的川平灣https://youtu.be/hhBgRg9TGRs2019石垣島自駕遊Day3~浮潛日https://youtu.be/O2eJc1xu09A2019石垣島自駕遊Day 2- 竹富島大半日遊https://youtu.be/X90yMY5Qxi02019石垣島自駕遊Day 1~平久保崎燈台https://youtu.be/Zb4FaF2nDVc如果大家喜歡我的影片，可以去YouTube 訂閱我的頻道。多謝支持......Blog：https://mibloghk.comFB：https://www.facebook.com/mibloghkIG：https://www.instagram.com/mibloghk/
