隨住近年來有機、生機飲食（Raw Food），崇尚天然食材「從農場到餐桌」（Farm-to-table）嘅概念成為熱話，新一代廚師為求突破，不斷找尋新食材，喺料理之中搵變化嘅可能性。高級餐廳餐桌上嘅食物造型裝飾（ Garnishing）愈來愈受重視，都會加左食用花（ Edible Flowers），除左做伴碟令到成個畫面構圖都好靚啲為賣相加分之外，亦都有平衡或提升食物味道之作用，可以突出菜式主角嘅味道。 但好多食用花都係由外國入口所以價錢都比較貴，喺香港買食用花就比較難，一般高級少少嘅超市就算City super都唔會入貨，只會搵到西餐常用香草。可食用的花唔方便運輸，因為唔可以焗親、佢擺又擺唔耐，又唔可以就咁喺花墟買得到，因或含農藥，亦唔能夠觸犯法例隨處採摘，安全嘅食用花唔易買，花適宜即時採摘即時食用，所以保質期短都限制左佢嘅廣泛性。除了一啲高級餐廳同農場合作即日朝早摘然而直接送貨，否則都好難有機會喺餐檯上「嘗」花。由於食用花需求增加，所以幾年前本地農場都有培植喇，春天至初夏3至5月正值花嘅盛放時期，要食用花就入農場搵啦！ 圖片取自有心機網上圖片 而食用花一般生長喺無污染嘅土壤之中，而且絕唔能夠用化學肥料，所以成本自然較高唔係好多農地會種，花心血資源培植嘅本地農場唔多，其中最具規模位於新界打鼓嶺有心機農場（Zen Oranics），廣闊嘅田園佔地有25萬平方公頃，係香港最大型嘅温室，採用科研技術，致力發展現代化有機耕種，農場仲拎左IFOAM國際認證，入面嘅品種拎左英國皇家園藝學會及美國農業部獎項架！而且佢地嘅產物供應俾好多酒店同米芝蓮級嘅餐廳用，真係好架勢啊！ 花開處處未行到入有心機農場已經聞到淡淡嘅花香味，入到農場就要遵守規則喇。 認識到園主JOEY本來係經營高級時裝生意，農場這片地前身本來是大型養豬場，佢自小鍾意研究花草植物，用左十年時間去了解佢地嘅特性，父親離世後同哥哥(良哥)倆兄妹都不忍丟荒土地，為左承繼父業都返黎幫手因而轉行運作農場，將舊有嘅農場打理到成為現有嘅精品農場，真係一個好大嘅轉變啊... JOEY帶我遊走佢嘅美味後花園，哩度種植左好多有機食用花啊！有金蓮花、海棠花、三色堇、琉璃苣花、青瓜花、西瓜花、馬鞭草花、迷迭香及英國玫瑰等... JOEY表示：「幾年前成功引進多款食用花品種喺哩度種，係香港首個有機食用花嘅，而且打鼓嶺係香港地最熱亦都係最凍嘅地方都會比較難種，大部分食用花是歐洲原生品種，當地氣候與香港唔同，幾時落種、種邊隻、花期又有幾長？ 都花左好幾年時間摸索，到近哩兩三年產量先至慢慢穩定」嘩！真係有心機先能夠成功。 入到溫室嘅環境真係令人覺得好治療... 望住啲花草有種大自然嘅療癒力量。 第二次去嘅時候，門口附近多左個食用花花園仔，一磚一瓦都係佢地自己整架！ 點擊圖片放大 +2 哩度開滿左係火箭菜（Rocket）啊... JOEY話火箭菜都好粗生，所以都生到好大面積。而哩朵黃色花就係火箭菜嘅花，都食得嘅，花嘅味道仲有更重嘅火箭菜味但女性啲。 話咁快，JOEY又帶左我去另一個溫室。 佢行到去痞底就比我睇金蓮花/旱金蓮（Nasturtium）嘅苗，都叫我食下佢嘅葉，佢形容為好得意嘅味道，金蓮花亦被歐洲大廚譽為最好食嘅花，唔... 真係令我皺左一下眉，因為我唔鍾意食Wasabi。 金蓮花嘅花瓣帶有木瓜果香味，而裏面的花芯同葉都有微微嘅芥辣Wasabi味。 小紅幫我採摘海棠花（Begonia），海棠花有白色、粉紅色、紅色，味道都係一樣帶有檸檬酸味，咬落口感爽脆。 三色堇（Pansy）顏色為紫、黃、白三色好鮮艷，食起黎就比較清新，口感柔滑。 三葉草（Clover），佢地亦會叫做酸味葉，帶有檸檬酸味。 萬壽菊（Marigold），用手郁一郁啲味就好香，帶有熱情果味。 泰國羅勒（Thai basil） 檸檬羅勒（Lemon basil） 單單係羅勒都有幾種，有泰國羅勒、檸檬羅勒... 等等。帶有濃郁羅勒香草味道嘅Basil Flower花嘅位置。羅勒花係整棵羅勒最嫩嘅地方，帶點蜜甜甜地，可以為菜式提味。 隔左兩個月再入去今次見到黃色傘形小花 — 甜茴香（Fennel）嘅花喇！佢葉嘅香味同形狀都同蒔蘿（Dill）好似，一開頭我地都認錯左，其實我地聞過味道仲比Dill重，同樣地可以裝飾用或當作香料用。 甜茴香嘅花可以伴碟裝飾用■而微小黃色嘅花粉都會當作香料使用，係茴香中氣味最濃郁嘅部分，亦都最值錢架！ 第二次去嘅收獲，豐富呢？色彩繽紛嘅食用花放埋一齊都已經好靚。 唔好以為食用花只係花裝飾擺設點綴咁簡單，JOEY經驗非常豐富分享左好多食用花嘅知識，佢地每種花都會有獨特嘅味道，第一次去佢仲好有心機將佢地寫底個名比我拎啲返屋企研究下。 其實我去左兩次先綜合打個總結比大家睇架，因為第一次去嘅時候JOEY話：「你隔多2-3個月再過黎哩度就唔用晒，啲花開晒到時仲多仲靚啊！」，因為朋友見我問香港邊度有食用花 ，而我有朋友識得JOEY就介紹佢比我識喇，好開心認識到一個對食用花咁有知識嘅朋友仔，真係長知識了！多謝佢地對香港農業嘅用心，真係值得尊敬。 不過有心機農場除左食用花，佢都出名培植復古蕃茄（Heiroom）、園內種植左過萬棵法國種嘅士多啤梨、七彩甜椒、彩虹甘筍、波板糖菜頭等... 聽落真係好有趣，等我下次用其他蔬果再介紹一下。 有心機農場 Zen Oranics 入場費：免費入場，自行參觀（溫室除外），可自費購買農場產品 開放時間：星期二至日上午10時–下午5時；逢星期一休息（公眾假期除外） 電話：6692 2671（JOEY 吳小姐） 地址：新界打鼓嶺坪輋（李屋村附近） 交通：1/ 駕車前往： 沿沙頭角公路龍躍頭段直駛，見「坪輋」路牌左轉入坪輋路，沿路直駛至昇平村外 小巴總站避雨亭，左轉入村內小路，依有心機指示牌直駛約五分鐘即達。 2/ 小巴前往： 從粉嶺火車站C出口，乘搭52K小巴往坪輋，於總站避雨亭下車，然後跟着路標步 行約20分鐘即到達農場。 網站：http://www.zeno.com.hk FACEBOOK：https://www.facebook.com/zenorganic/ — ♡ F O L L O W M E O N ♡ → YOUTUBE：http://www.youtube.com/c/MABKITCHEN [ 點這裡訂閱 MABKITCHEN：https://goo.gl/XnpMyv ] → INSTAGRAM：http://instagram.com/mabkitchen.mab → FACEBOOK：https://m.facebook.com/mabkitchen.mab/ → BLOG：http://mabkitchen.blogspot.hk 歡迎活動邀請及品牌合作等工作連絡 E-mail：mabkitchen.mab@gmail.com
