士多啤梨耐寒怕熱，冬天係摘士多啤梨嘅好時機，無錯啊！又到左士多啤梨當造季節，由於今年天氣遲遲未轉冷又多颱風嘅關係，收成期都因而推遲到1月尾先係收成高峰期，仲記得上年臨近季尾(2月)先有時間去士多啤梨園，遲去嘅結果係乜都摘唔到，今年蜜兒決定要早少少新年前出發喇！ 大棠有機生態園早幾年都係去果度摘，今次就試下去另一個士多啤梨園，都一樣係大棠，就在不遠處，大棠村口牌坊後面籃球場嘅行返過對面就會見到大大個紅牌黃字寫住「朗屏自摘士多啤梨園」。 拿！去到見到荒田咁嘅樣，唔洗驚！你冇去錯地方，因為要行入多少少就會見到一大片士多啤梨園架喇，今年園主楊生仲要加大左塊田等大家摘多啲。 哩個士多啤梨園全部士多啤梨都係日本品種黎架！有日本靜岡縣－章姬、日本佐賀－清香，日本熊本縣－紅臉頰、日本奈良懸－紅寶石、日本福岡縣－博多甘王。清香市面上較稀有，最吸引的是其果甜及心形的外表，甜度可達16-18度。 入場時可以拎個籃、交剪就可以摘架喇！ 今日天氣真係好好啊！好在都係假日我放假，可以親親大自然放鬆一下，好好嘅假日活動啊... 當少都話：「你睇... 果度有粒好紅架！」 我望左一陣先知掛喺我地頭頂嘅網係用黎隔住啲葉唔會趺落田... 咁細心嘅咩？ 有時葉底都有架！記得搵埋啊！ 園主都會分好晒品種嘅區域 哩個場啲士多啤梨真係都幾大粒，晏就去就摘唔到架喇！（早去早享受） 採摘技巧 | 揀色澤紅潤、形狀飽滿嘅果實。 避免用力控捏壓果實、拉扯根莖或把植株連根拔起。 在果柄預留約一厘米處剪下。 點擊圖片放大 +2 摘下摘下，埋單哩度都有成兩磅。 近門口位有得沖洗下啲士多啤梨，即食先好磅完拎去洗。（唔係即食嘅就唔好洗住喇！） 食材小知識 | 士多啤梨具豐富嘅維他命C，有助增強免疫力，且平均一粒只有4卡路里，唔怕吃肥，且含天然色素「 花色苷 」，經美國農業部數據庫以綜合不同營養素，得出抗氧化指數 (ORAC) 士多啤梨抗氧化指數係4302。 原來士多啤梨有級數之分 | 級數並唔係以甜度衡量，而係份量愈重，外形愈工整，價錢愈貴。香港市面嘅日本士多啤梨大致分成L、2L、3L、G、DX，級數都可喺原裝紙盒上查閱。市面常見嘅Size都是2L、3L，屬中等貨色。 因為上次嘅經驗，今年去之前打一打電話過去問清楚有冇得摘先去，免得比人摘晒，去到乜都摘唔到。打到去老闆仲話：「你地想黎真係要早少少，晏啲都比人摘晒」，我地差唔多11點去到，差唔多去到12點人就開始多... 的確行晒全場真係比人摘得七七八八，大粒嘅無晒得返啲細細粒陰公（所以想去摘嘅朋友仔要留意喇！[1]打個電話去問下，[2]預早上去摘） 不過園主楊生都有話，隔多一星期去新年果水會全地都紅晒（即係又靚又大粒喇），想摘就要快喇♡ 今年嘅7-12月仲可以摘葡萄tim啊，到時再摘過！ 收費 | 免收入場費，帶走就$80/每磅。 交通 | 朗屏西鐵站 K66 巴士大棠(回旋處)站落車 電話查詢 | 9251 8926 網址 | www.YL.hk/lpsb _ ヾ(^∇^)♥ FOLLOW ME ON ♥ (^∇^)"/ YOUTUBE | http://www.youtube.com/c/MABKITCHEN [ 點這裡訂閱 MABKITCHEN：https://goo.gl/XnpMyv ] INSTAGRAM | http://instagram.com/mabkitchen.mab FACEBOOK | https://m.facebook.com/mabkitchen.mab/ BLOG | http://mabkitchen.blogspot.hk 歡迎活動邀請及品牌合作等工作連絡 E-mail | mabkitchen.mab@gmail.com
