難得疫情舒緩，可以同朋友出嚟飲下茶，今晚就揀咗喺灣仔新開分店嘅【龍點心】。全日有得飲茶都唔係新鮮事，不過見到佢哋裝修走懷舊復古風格，再配合一系列嘅室內設計元素，十足十時光倒流，仲有啲喺外國Chinatown嘅感覺。【龍點心】以新鮮即製嘅手工點心作招徠，最近重推出多款矜貴宮廷點心。將經典矜貴食材糅合全新創意重新演繹，可以話係新派點心嘅代表，創意十足。而家灣仔店全新開業優惠，晚市六點後入座，即送手工製宮廷點心一客宮。手工製宮廷點心 (💰$0，灣仔店全新開業優惠) 水晶桂花糕 - 水嫩晶瑩嘅桂花糕被造成桂花外表，除咗口感爽滑Q彈，仲有淡淡桂花香，原來仲有美白肌膚同埋化痰止咳嘅功效！芸豆卷 - 紅白相間嘅顏色已經好吸引，一咬落去白芸豆外皮軟綿綿嘅口感，同埋甜度剛剛好嘅紅豆沙餡，一嚿真係唔夠喉！紫薯山藥糕 - 以白砂糖、紫薯、山藥製成嘅軟糯糕點，口感醇滑冰爽，想食返幾件都唔過份。黑虎掌菌燉瘦肉湯 (💰$62) 呢個湯採用名貴黑虎掌菌，湯色紅亮而且湯頭非常濃郁。一倒出嚟已經聞到香味撲鼻，菌味非常濃郁。黑虎掌菌肉質肥美、口感清香糯嫩，最重要嘅佢係富含營養，極具藥用價值，食療養生之選。南北杏采燉豬肺湯 (💰$48) 南北杏采燉豬肺湯有補肺止咳，生津開胃，助人體迅速消除疲勞嘅功效，非常適合經常用腦又忙碌去捱更抵夜嘅香港人。雖然呢個湯唔算好特別，但最重要嘅係夠晒足料，而且仲冇味精添，唔會越飲越口渴。坐低就有得飲，連湯包都唔使開，夠晒方便。一龍大滿足 (💰$62) 松露野菌晶瑩餃 - 矜貴黑松露配搭上多款新鮮野菌，有複雜嘅幽香，令人難以抗拒，簡直係素食者最愛！筍尖蝦餃皇 - 鮮甜彈牙的鮮蝦肉中混入甘甜清鮮嘅筍尖，豐富左蝦餃味道同埋層次。豌豆桃子 - 熱辣辣嘅壽桃包入邊加咗豌豆蓉，一陣香甜脫俗嘅清香。酸菜魚鳳眼餃 - 龍利柳，酸菜魚加入鮮蝦、酸菜、野生椒辣嘅全新食法，酸辣美味，真係停唔到口。蟹粉菠菜香蝦餃 - 大大隻香蝦中加入鮮嫩菠菜，再鋪滿蟹粉，無懈可擊。鹹蛋黃墨魚燒賣 - 傳統燒賣中放入流心爆汁鹹蛋餡料，加上墨魚肉餡，口感豐富又匹配，「鹹蛋炸魚皮」愛好者必食。龍燒賣 (💰$42) 麻辣牛肉燒賣 - 川香麻辣牛肉做燒賣餡料，牛肉滑嫩之外，仲有一陣麻辣香，感覺新鮮。龍蝦汁墨魚燒賣 - 傳統燒賣加入手打墨魚、豬肉、龍蝦汁提高口感同帶出鮮味，正。鵪鶉蛋燒賣 - 免治豬肉及蝦膠做料，配上整粒鵪鶉蛋，蛋香肉鮮，經典大熱！懷舊燒賣 - 飲茶又點少得傳統燒賣？手打豬肉、冬菇、蝦肉成餡，口感結實飽滿之外，隱約帶香菇的幽香。長腳蟹燒賣 (💰$68，2粒) 未去到日本，真係飲茶都要食下鮮甜多汁的日本松葉蟹腳！真材實料，啖啖鮮味蟹肉，再配上飽滿豬肉內餡，值得encore！青森縣黑蒜帶子燒賣 (💰$48，2粒) 除咗長腳蟹，又點少得被稱為大蒜中嘅「黑金」- 日本青森縣黑蒜！天然蒜香，酸甜無刺激，配上同樣鮮甜的帶子及豬肉餡料，真係啖啖驚喜黃椒醬排骨 (💰$38) 非常有創意嘅菜式，第一次食黃椒醬配排骨。排骨鮮嫩，黃椒醬辣味輕但清香味濃郁，值得一試！脆脆富貴紅米腸粉 (💰$48) 今日終於試到，呢個被稱為「腸粉界的天花板」嘅脆脆富貴紅米腸粉，外軟內脆，蝦仁爽口彈牙，爽呀！大澳蝦醬鮮魷卷 (💰$52) 蝦醬配特級鮮魷，竟然可以拎嚟整炸嘢，別具風味。鍾意食香口嘢嘅朋友一定要叫。龍躉球蒸飯 (💰$76) 近排天寒地凍，梗係要食返D熱野暖暖身啦！龍躉又滑又肥美，醬油唔太鹹但豆味濃郁，帶出龍躉肉的鮮味。今晚食完咁多菜式，絕對體會到龍點心師傅貫徹傳承創新嘅宗旨。以食材、味道、工藝著手創作出咁多好味又靚靚嘅新派手工點心。而且裝修中非常之有心思，食到好餸之餘仲可以打卡！【龍點心】重推出手機app「龍點心」，唔使入會費，累積消費，就可以免費登記成為會員，仲有總值 $150 迎新禮劵，未來亦有會員限定驚喜優惠，貼心服務。📍龍點心 (灣仔)📍地址：灣仔軒尼詩道216-218號地下A&B鋪📍電話： 2338 2318 📍營業時間：07:00 - 00:00📍網址：www.lungdimsum.com
