今年早凍，一早已經想食蛇補補佢，本來我對蛇都無乜特別期望，黎黎去去咪蛇羹蛇湯糯米飯，但輝哥私房菜真係令我有驚喜 活肥蟹蛇羹宴 $398/ head 九製話梅蒸活肥蟹無啦啦加個話梅做乜？清蒸蟹唔得咩？食左一啖，就知自己係幾無知，話梅汁酸酸甜甜好開胃，個蟹蓋d膏爆哂出黎，蟹膏味濃，醬汁開胃，絕配 沙薑鮮珍肝岩岩食完比較濃味既蟹，黎個清清地過一過冷河，鵝腸爽口，珍肝夠粉，加埋個薑汁浪一浪口清下喉嚨 主角菊花太史五蛇羹一般食蛇好少會俾埋菊花做配料，輝哥一d都唔馬虎，菊花，檸檬葉，脆脆一應俱全，蛇羹足料又夠杰，一啖蛇羹一口脆脆，人間絕配 古法蒸杉老虎斑大佬呀，兩個人黎食整條手臂咁長既斑，點食得哂呀，點知食下食下停唔到口，蒸得岩岩好，入口嫩滑，一d都唔韌，如果有得叫白飯我起碼送到兩碗，好在朋友提醒之後仲有個糯米飯 百花酥炸五蛇丸好老實講，望落似一般飲宴既炸丸本身真係無乜期望，但咬落去又知自己係幾咁無知，個蛇丸𥚃邊有九制陳皮，食落去有三個層次既口感，第一個感覺係彈牙鬆軟，第二個感覺係咀嚼肉丸既煙韌，第三種係陳皮既回甘，食得出個陳皮絕對唔係次貨，中間仲夾雜左d檸檬葉，可惜只有兩粒，就算佢黎多五六粒，多多都食得哂 蝦子柚皮生扣鵝掌我同大部分香港既時下年青人一樣，都比較抗拒食”皮”既野，而且仲係出名澀既柚子，唔係朋友叫我試吓，真係無打算食，但原來味道唔係我想像中咁壞，柚皮扣鵝掌汁入口似薯蓉，鵝掌無因為要炆到入味搞到溶溶爛爛，筋骨位軟硬適中 生炒臘味糯米飯平時係街度食d糯米飯d，又黏又濕，d花生得小猫三四粒驚死俾得多會食到佢破產咁，輝哥絕對唔同你慳，啖啖飯都有花生送入口，臘味唔會又乾又硬夠哂味，一碗落肚完全唔夠喉 反傳統既焦糖法式燉蛋喂，好地地食緊中菜整個西式甜品係咩玩法，但係但燉蛋香滑易入口，面頭火炙焦糖個火喉岩岩好，唔會太燶又唔會唔成型，le個絕對係傳統中菜中既清流老實講，食之前原本覺得個價錢係偏貴，但食完覺得係物有所值，每樣餸菜都足料一d都唔馬虎，而且輝哥仲會不時走過黎介紹下d餸菜，夠哂親民▲ About Fai Gor's Kitchen 輝哥私房菜2/F, Place 18, 18 Cheong Lok Street, Jordan佐敦長樂街18號18廣場2樓Tel: 2606 7278XOXO!Stay Tuned!E-mail: yanezwong@gmail.comFacebook: https://www.facebook.com/yanezgardenIG: https://www.instagram.com/yanez_yw/IG: https://www.instagram.com/takeateasy_852/▲免責聲明是次產品/產品資料由品牌提供，本文章所發表的全部內容均屬個人意見及感受，並不代表該品牌之言論及立場如需協助或希望獲得更多有關產品資訊,請直接聯絡該品牌查詢或∕和尋求相關專業意見．如從而引起任何損失或法律糾紛，本人概不負責.
