我諗好多人後生果陣，總有一段時間是對《喜愛夜蒲》入面燈紅酒綠嘅生活充滿好奇，識玩嘅或者可以變身做縱横情場無敵手，唔好彩嘅就跌入火坑一去冇回頭。咁當然我都一樣青春過，不過好快就知道衣啲生活唔啱自己，或者係果幾晚在場嘅男士發現我唔啱佢地(sad)。所以小妹已經巧耐～巧耐冇落過club，至多係耐唔耐同朋友仔摸下酒杯底。不過早前，我竟然闊別多年地去左次clubbing，仲要係喺日本，我內心真係好激動呀！ 事緣前排我一個人去咗大阪毒樂樂，喺hostel認識咗兩位仔仔，分別是一位法國佬同我至愛嘅Oppa，吹吹下水佢地話諗住夜啲去見識下日本嘅club，然後問我有冇興趣。唔知是咪人在國外，個心真係會大膽啲（個人都好似寧舍孤獨啲），受邀請果下我都有啲心郁郁。不過咁，落club要著戰衣是常識吧？我無端端喺邊揾件大殺四方嘅裙返黎呢？點知佢地不斷話"No problem"、"It's okay"、"Don't worry"……最後，我就一身T-shirt加短褲嘅街坊look咁比人拉左出去。 一路行過去嘅時候我個心都好忐忑，你知啦，著錯衫好seven嫁嘛，就正如未到Causal Friday你都唔敢著條牛仔褲返工一樣啦！就算一陣人地肯比你入去，你望住隔壁果位喺樹酥胸露腰，當下你都只會覺得自己是零。。。咦，但睇黎好多人同我一樣，都係冇備而黎喎！！去到門口排隊果陣，我發現好多女女同我都一樣著得頹﹑幾頹同好頹。短褲仔，入得。波鞋，入得。普通短Tee，都入得。如果喺香港，稍為高級少少嘅地方相信一早已經將你拒諸門外。目測所見，男士嘅服裝要求都唔高，因為我隔離果兩位都唔好得我好多，所以我有理由懷疑，間野係放我地入去幫人做陪襯嘅。 拿，我果日同右邊衣位女仔都係著得差唔多咋嘛！只係我冇佢咁kawaii呢。 男仔衣身裝束唔知入唔入到香港啲club呢？ 入場嘅情況同香港大同小異，門口著住西裝嘅實Q哥哥會check證件（記住要帶passport！），之後喺reception比錢就ok。最重要嘅係，女仔入場唔駛錢！仲要有free drink！難怪香港男仔要投訴夜場性別歧視啦哈哈。至於今次我地去嘅Giraffe Club據聞係大阪最大嘅club，有成4層咁多。1樓係櫃台、化妝室同locker；2同4樓就係舞池區。如果你純粹想飲酒傾下計，可以選擇去3樓嘅lounge area，不過有機會被包場而唔開放。 講堅，今晚我都預左冇人會咁重口味走嚟認識我，我亦唔想影衰晒全港嘅港女，所以我一直都好收埋自己，死跟兩位朋友由1樓遊走到4樓。雖然我地到果陣其實只係九點幾十點，但其實已經好多人食飽飯就嚟，門口條隊都唔短。開心大發現嘅係，在場嘅人原來真係嚟飲野同跳舞嫁！！喺香港或者你喺舞池un兩un就會有個不知名人士痴埋嚟，反而衣度嘅日本人真係自己同friend圍埋一堆亂un，或者一個人solo dancing，重點係佢地堅．跳舞，happy完就走人！咁當然，溝仔/女嘅場面總係有嘅，但你冇諗過果對互flirt中嘅男女隔離會有堆T-shirt男喺到亂咁fing囉。 如果你問我日本同香港夜店嘅分別，我認為配套上是相差無幾，都係果啲飲品，果啲價錢，果啲歌，果啲環境，係人嘅質素唔同啲（你懂的）。而今次初體驗帶比我最大嘅衝擊，就係我應該俾《喜》系列涂毒太深，原來落club都可以落得好純情（？）！（Giraffe凌晨1點就閂門趕人返屋企，喺香港應該岩岩先係夜生活既開始……）不過其實係咪我太耐冇去過老蘭，而家香港果啲係咪都係咁呢？ 日本clubbing三大特點： 1. 你著成點都唔緊要嫁！ 2. 跳舞！跳舞！Let's dance!!!! 3. 日本人似乎對外國人有莫名嘅恐懼......(?) 後記： 為左要喺有限嘅時間內盡可能體驗日本夜生活，當晚我跟住法國佬佢地仲去左live house睇band友表演，雖然我唔是好識欣賞……有機會再講（笑）。 GIRAFFE osaka 地址：大阪市中央区宗右衛門町7-9 宗右衛門町ビル 電話：+81 6-6211-1516 營業時間：19:00 – 01:00 Everyday 網址：http://giraffe-osaka.net/ （有中文/英文介面） GIRAFFE osaka嘅位置exactly對住條道頓堀川，行完心齋橋過黎輕鬆下，啱啱好。 全4層，2樓及4樓均為舞池。唔跳舞真係對唔住自己！ 雖然官網寫住：謝絕穿著休閒服、運動服、背心、工作服、涼鞋或布希鞋等休閒裝扮者進場，但一身頹look的我照入無誤。 女性完全入場無料！萬歲！！ 圖片來源：內部禁止拍照（我又咁啱真係冇影），圖片取至官網。
