幾經艱辛後我地終於都被放行，正式踏上318國道！ 經過左巴塘一役，打後其他鎮縣嘅關卡都唔算係啲咩一回事，基本上都係交晒香港身份證同回鄉證比公安，佢地再嚟對下我地個樣咁就攪掂。不過之後我地發現，越接近拉薩程序似乎越繁複，亦都越嚴謹。有次我地去到入某鎮前嘅office仔，竟然因為冇人（願意？）負責處理我地衣班香港人，叫我地直接去鎮入面嘅公安所。果陣因為我係成車香港仔女入面最大果個，不成文地做左代表跟司機一齊入去(why always me??)，果陣嘅情景就係一堆公安圍住停車場個更亭食煙吹緊水，望住我地問：[國語tone]阿生，你嚟做乜＿呀？當佢地知道我地來意之後就放我地入去，咁我就跟住司機死死氣爬上兩層（喺高原地帶真係做少少運動都喘晒氣），去一個門口痴住「在藏外國人乜乜乜」嘅房搵負責人。負責人仍然是擔住支煙，問晒我係幾號香港出發、邊度開始入藏、幾號會去到拉薩、幾號走之類等等。喺我等緊佢張approval嘅時候，我望住痴喺牆上面果大大張寫晒西藏區敏感日子出嚟嘅poster（真係poster黎，有晒design，寫晒果日發生過咩事），嗯原來達賴喇嘛生日是好危險，咁張野寫埋六四都是好人之常情嘅... 一路上，因為大家都比較窮，所以如可選擇都希望住平啲食平啲，有普間就住普間（不連浴室廁所），有時幾日冇屙屎好想要馬桶就比多少少住標間。但同樣地，越近拉薩就越麻煩，直至去到林芝（入拉薩前最後一個大鎮）就出事了。林芝市中心其實已經算幾發達，車行緊嘅係柏油大道，有街燈（！），附近有機場，同之前一路走來嘅果種荒山野嶺感覺真係差好遠。一如概往地想搵平旅館，去左幾間被請食檸檬，只因為我地係「香港人」。一黎到林芝，唔知點解我地就被升格為「貴賓」，被限制一定要住三星級以上既酒店或者國際青年旅舍。林芝冇hostel嫁，咁姐係點呀，姐係＿那媽頂硬上囉！如是者我地果晚住左成個旅程入面最豪嘅酒店，包埋自助早餐，樓下仲有麻雀機玩嫁，而家諗返起都覺得好鬼興奮呀！/_\ 拉薩，同樣能夠享盡三星級的貴賓待遇，thanks so much！不過去到拉薩之後有得揀住hostel，又會撞到好多香港人，咁多人一齊被水都開心d，嘻嘻。其後司機話佢識熟人可以安排我地去珠峰，仲出個優惠價比我地香港人攪特別簽證之類咁話，所以我地又好乖乖咁每人交出幾百蚊啦。結論就係我地衣班乜都唔識嘅死港女死靚仔，資料搜集做得唔夠人多，又揸住個咁「特別」嘅身份，唔呃我地就正傻仔。所以大家記得出門前要準備多d啊！>.< 香港人要入藏，其實唔難，只係有d煩。大家只要有定心情準備，接受官僚就是官僚嘅事實，迎難而上，最終都可以成功去見布達拉宮一面嘅！而對於小妹黎講，雖然「香港人」衣個身份唔多唔少帶黎左d不便，但我暗地裡仍然為左衣丁點特別而感到慶幸，真係唔知好事定壞事呢？唉。 記小事一則： 回程我地選擇行滇藏線落雲南再返香港，途經通麥天險果陣遇著塌方，被迫滯留喺前方嘅魯朗鎮兩日，仲食埋當地好出名嘅石鍋雞。果陣當我咬住隻雞脾心裡淌淚終於唔駛再食川菜嘅時候，司機霸氣地掉出一個電話，叫我地打去搵什麼交通部部長，話只要撻我地香港人個朵乜乜乜就一定即刻放行！我當堂打左個突，心諗傻豬黎嘅，你以為香港人真係好巴閉呀而家？仲有前面塌方仲清緊路嫁，佢放你行你都過唔到去嫁嘛嗚嗚... hostel附近的一間書店，很是喜歡。 hostel牆上的字：自己選擇的路，就算跪著也要走完！ 廣東話詮釋：條路自己揀，x街唔好喊！？
