繼續講下西藏囉～～ 而家交通發達，香港人要去西藏其實唔難，有人選擇小明上西藏咁搭火車入藏，有啲錢又想慳下時間嘅就搭飛機直達拉薩，而我同朋友就先由香港飛到四川，再包車經川藏南線、花左差唔多8日先去到拉薩（仲有其他路線可以選擇）。啊，你仲可以選擇踩單車/行路入去嫁！唔係講笑，每次見到都好佩服#adore。 我地點解要選擇包車呢？因為可以睇靚景睇足8日！不過首先你需要有足夠嘅時間，以川藏南線為例，最快都需要7、8日先入到拉薩，再加埋你之前可能想喺四川玩幾日+拉薩、鄰近地方幾日，仲未計你走果陣會點走……前前後後閒閒地都起碼要成2個禮拜嫁！另外不得不承認，包車除左包車費外仲要比埋開車師傅多日來嘅食、住費，算唔上係一個超級慳錢嘅入藏方法，而本身就好清窮嘅我就被食左隻車了嗚嗚。不過你問我值唔值？一個字，值！因為川藏南線嘅景色真係好靚！ 至於我嘅團友呢，4個都係懵盛盛咩都唔識，4個都揸住香港身份證同回鄉證，其實都唔知好事定壞事嚟，因為有咩事大家死就一齊死哈哈。咁作為親愛的香港特別行政區市民，去西藏玩有冇特權呢？Well，是冇嘅。是咪同所有大陸同胞嘅待遇一樣呢？Oh no，又唔係喎，咁姐係點呀，真係好難捉摸呀！而我只知道因為「香港人」衣個「特殊」身份，小妹試過不下數次出入公安所、試過差啲要訓街、試過來回又折返咁去拎張入藏證……真係多謝晒^_^ 整條川藏南線全長2116公里，由成都到巴塘前都未算入到藏區，我地部車毫無阻攔咁喺路上奔馳，但我就因為高原反應頭痛到想死咁擠… 好不容易死頂左2、3日，終於去到四川同西藏嘅分界縣巴塘，影到傳說中嘅西藏界牌啦yeah！我地幾個人都好hyper，至於藏人司機個表情更精彩，佢就好似inception入面個阿cobb、臨尾喺機場就黎過關果個明明巧興奮但又有d忐忑、迷惘、好想扭屎忽花咁嘅樣，佢表示有一段時間冇回家（即回西藏）所以好興奮，亦擔心自己入唔到關（下？連你張證都冇啦啦比人吊銷左？），結果…… 結果就係，我地嘅第一次過關以失敗告終。 首先，你若要闖界，請乖乖上繳所有身份證明文件。衣個程序無論你係漢人定藏人、係咪香港人都需要做，而且係每次入唔同嘅鎮縣前都需要，我相信近幾年入藏嘅香港人數目唔少，所以大部份關卡嘅公安們對住我地除左睥多兩睥之外，做野都算係駕輕就熟。（另外每次佢地都會派一張限速卡比司機，限制我地嘅行車時間，有時快快脆早到左，大家就會停喺關卡前面等到夠鐘先過關，令到我對於限速嘅成效非常存疑……） 喺真正走上318國道（即川藏南線，由入藏後開始）前嘅第一關，亦係最難過嘅一關。未能過關嘅問題唔係來自我地幾個外來物體身上，而係因為司機藏人嘅身份而受到阻撓。一開始公安指司機大佬準備既文件唔夠，類似係要佢解釋自己點解要入藏、同我地咩關係（我地自稱為朋友，佢帶我地去拉薩玩）、仲要有保證人，白紙黑字寫晒出黎。結果因為司機只係拎住上一次入藏既文件想博下懵但又衰左，只好立刻狗衝返巴塘縣，周圍搵收到fax既地方等人send返文件比佢，一路上聽到佢不斷鬧，鬧點解藏人返個屋企都要咁麻煩乜乜乜，坐後排嘅我地都好無言以對…… 金沙江大橋上嘅西藏界，oh yeah！ 傳說中嘅限速卡 川藏南線圖（轉網絡)
