背包客最常聚集嘅地方，不難估當然就係backpacker或者廉價hostel。好地地有私人浴室大床唔訓，係要同埋啲三唔識七既人迫埋一間房？聽落實在很傻豬，但奈何世上窮人多，孤寒的人更多，一段旅程咁多to do list入面「享受訓覺」相對好次要，因為對好多人黎講專程搭飛機飛到老鬼遠，都唔預自己會留喺間酒店幾耐，寧願啲錢用黎食好啲，食落肚都叫做真係袋落袋丫嘛。當然以上都可能只係個別事件，不適用於情侶結伴出遊，我諗佢地都好追求一間私隱度高又隔音嘅房嘅，嗚呀。 小妹的確訓上下格床多過訓大床，但選擇背包客棧時都有啲個人小小要求。要完全符合價錢抵衛生乾淨交通方便......就好似搵個靚仔有錢高180cm會考30分......嘅男朋友咁，冇話唔得，比啲心機搵啦。不過其實最得我歡心嘅，又往往比較容易達成以上大眾要求嘅，通常都係非連鎖、家庭式經營、仲要細細間好多時包埋你早餐果種！嗯，姐係類似大家都聽過嘅民宿囉！ 今次我揀左京都嘅一間小民宿黎分享－－Kyoto Guesthouse Hannari。衣間民宿位於京都二条，位置唔算超級方便，附近嘅景點只係得二条城，其他就需要搭巴士或者扮偽京都人踩單車啦。咁簡單啲講，衣間野並唔係市中心地帶。哇，咁代表啲咩？姐係佢實實在在係位於平民區嫁（＝香港你甚少見到強國遊客嘅地方）！京都歷史傳統氣息濃厚，一排排嘅町屋每間閒閒地都有幾百年歷史，衣到嘅老闆就將內裡改建成旅館，希望搵錢嘅同時都能夠延續同保留傳統文化。你睇，門口睇落同隔離鄰舍一樣嫁咋。 門口有塊布果間。仲唔係呀木村san住緊果啲！？（網絡照片） 打開門，就係一個棺仔骨骨嘅common area，有電腦用有電視同漫畫免費比客人睇，夜晚當大家都差唔多返晒黎嘅時候，就會喺到舒服坐下傾下計咁。 其實衣間民宿真係好細，地下係common area、開放式廚房、兩間浴室同洗手間；二樓就全部都係客房，總數有16張床。所謂嘅「男士房間」其實只係走廊擺左2張上下格床，不過勝在有得拉床簾，我見大家都訓得幾安心。 就咁睇以上介紹，好似同一般背包客棧無異，仲要細左添！不過小妹就係鍾情於佢嘅「細」，同埋內裡無限嘅人情味。多得町屋如斯嘅細小格局，每次打開門首先會經過reception，靚仔老闆（非單身嗚嗚）就會同你講句「おかえり（歡迎回來！）」，然後你懶洋洋咁報以一個微笑，喺玄關除好鞋換上布拖鞋，斯斯然咁行去雪櫃，打開，倒一杯無限任飲既午後の紅茶一喝而盡，成個畫面係咪好日劇呀！！ 正因為衣類旅館屬於非連鎖式，商業味自然少啲，老闆對於自己既旅館都會寧捨落手落腳打掃清潔。你唔會覺得佢係為左賺大錢（百幾蚊一晚x16張唔知係咪全full booking既床，可想而知），反而佢既服務甚至選址等確實令你感到何謂賓至如歸嘅住宿體驗，衣個就係我喜歡細小又傳統、分分鐘老闆娘會半夜偷偷幫你拉被嘅家庭式民宿嘅原因。不過，其實小妹咁岩揀到一間鍾意嘅hostel，除左撞彩數，都仲好睇果個城市嘅歷史同環境。同一個國家，同一個地域，大阪同京都已經好唔同（你說對不對！），相信大阪家庭式旅館帶來嘅體驗，應該是嘻嘻哈哈歡歡樂樂而非京都散發出黎嘅果陣懶慵優閒味道吧。 後記： 喺衣度住嘅期間我認識左一位香港攝影師，特登嚟關西同新人影結婚相，因為book唔切酒店咁唯有「頂硬上」住下hostel啦，結果當然係一次唔錯嘅經驗（因為佢話真係平好多，仲要識到人，姐係我嘻嘻～～）。 Kyoto Guesthouse Hannari 地址：京都市上京区日暮通下立売下る櫛笥町693番地 電話：+81-075-803-1300 官網：http://hannari-guesthouse.com/
