<遊記> 新潟 ~ 摘"巨峰"! 夏天已到，分享下日本摘水果嘅經驗先。 話說有一年嘅10月份4條友仔去”新潟”玩，當日行程如下： 行車路線：由岩船港 去 弥彥公園 經 日本海東北自動車道，全程只需一個半小時。 （去日本梗要玩盡D，唔會浪費任何時間） 諗住插個景點入去充實個行程，於是上網睇下順路有無嘢行。 Check下個Google Map，發現有個”聖籠町”嘅地方。 跟住搵下資料，原來呢個地方有好多果園。http://van-rai.net/seiro-kanko/ 當日下午3點左右，我跟住車上嘅GPS駛到”聖籠町”呢區， 入到一個排列整齊嘅溫室屋地帶，到處長滿密密麻麻2米多高嘅小樹， 我地慢駛兜了十分鐘，睇睇環境，發現有十個果園以上， 最後就選擇呢間 <<こばまさ農園>>，就將架車停係門口旁。 果園門口有張長枱，有2個嬸嬸忙於整理枱上一份一份嘅提子，似係”巨峰”提！ 我地行到枱前”指手劃腳”加”唔咸唔淡”日文表示想摘提子， 哈！佢地好醒目知道我地意思，立即付上每人一個膠籃 + 小剪刀1把。 急步行入果園內，眼見於樹架上掛滿一抽抽大大粒嘅提子，心情非常興奮! 點擊圖片放大 各人忙著拍照, 又笑又叫, 真係難以形容當時混亂情況。 諗一諗你隨手一摘就可以食，超爽！ （巨峰提子比較圓身及大粒，汁多味濃同吹波膠味道相似） 經過廿多分鐘嘅戰鬥，心情亦開始平靜，而且飽飽地，雙手沾滿提子汁。 衝動過後，大家研究過佢地無講價錢，而且比個膠籃我地，應該係”照秤”! 咁我地都識做，揀咗幾抽提子去計數，當時比錢時，佢地好大方送多一大抽巨峰提比我地， 只係收JPY500 !! 十分感動！日本人如此好客。 最後我地要求同佢地合照，當然無問題啦。 有趣嘅經驗！ 21062015 23:49
