離開Salzburg嘅下一個track point 是這次旅程其中一個重點行程，係一個山明水秀的小村，難怪L先生一直視之為dream place - Hallstatt! 去Hallstatt嘅交通相當轉折，由Salzburg出發先搭150號巴士去總站，溫泉小鎮Bad Ischl (巴德伊舍)，再轉火車約20分鐘就到Hallstatt火車站；但呢個火車站其實同Hallstatt隔住個湖，所以出火車站後要行一條小斜路落到湖邊再搭接駁船過對岸，而船既班次係完全配合火車到達同離開時間，所以呢度無時間慢慢睇，船開咗就要等成個鐘先有下班。 到咗Hallstatt上岸後先去酒店check-in；因為今次能夠plan行程既時間實在短, 搵酒店時就只有呢間同村入面另一間無景既旅館有房， 而我們book嘅就係全Hallstatt最後一間湖景房! (因為Hallstatt好細， 酒店房亦少，所以好多人都要住附近既鎮然後嚟day trip)； 呢間酒店其實起方便，佢正正位處碼頭旁邊，對帶住行李嘅我哋絕對有優勢；攞房後更發現原來被upgrade了住Junior Suite, 算係旅程一個小驚喜! Heritage Hotel Hallstatt 攞咗房，放低行李之後出去行下個鎮， 時間已唔早，好多舖頭都開始關門 (呢度基本上所有舖頭都收六點)， 去咗個高位同最著名嘅"明信片角度" (連google map都有標示"postcard angle”!) 影相，然後就去一早book咗嘅餐廳食dinner。 其實呢間餐廳位於另一間酒店入面，而呢間酒店嘅view 應該都可算係全個Hallstatt 最靚；所以就算住唔到， 點都嚟一嚟滿足下，而且呢間餐廳叫Lake Terrace，顧名思義就係湖上嘅一個平台; 好彩一早book 咗， 因為餐廳都差唔多坐滿，而我哋book位時再三要求要坐湖邊位，最終如願坐到最開一行，同個湖完全零距離! 由黃昏坐到開始天黑，真係唔捨得走! Seehotel Grüner Baum - Lake Terrace 第二朝一早起身見好天，連早餐都未食就再行去postcard angle影朝早的Hallstatt， 呢個時間遊客更少，基本上得我哋喺度慢慢欣賞呢個寧靜既湖邊小鎮，實在太靚，後尾見有舊雨雲殺到先返酒店食早餐。唔知好彩定唔好彩， 返到酒店後就開始落大雨， 見短時間內都唔似會好天，就提早搭船離開Hallstatt， 因為這天係星期日，所有舖頭都唔會開，所以都plan咗這天會搭四個鐘火車去下一站， Tirol州首府Innsbruck。 只可惜未能行遍整個Hallstatt, 山上的鹽礦同觀景台都未能去到，唯有給自己藉口可再來一次啦~~
