從倫敦飛兩小時來到奧地利的薩爾斯堡(Salzburg), 周圍由英文變成了德文，就連去超市都有少少唔慣! 抵達時已經係夜晚(雖然未天黑), 所以返到酒店就直接喺樓下食dinner然後休息, 準備第二朝國王湖之旅。 國王湖(Königssee)其實位於德國境內, 但從Salzburg過去只需要搭840巴士到德國的Berchtesgaden再轉841巴士, 總共約一個鐘多啲就到; Berchtesgaden周邊其實仲有其他值得去既地方, 如二戰時希特拉的據點鷹巢, 可上山欣賞國王湖區的Jenner Bahn(當時維修無開), 在山谷中有間好靚小教堂的Ramsau等; 但由於時間關係，都係選擇去國王湖遊船河兼郊遊。 登上電動小船, 行駛於這個以清徹和寧靜聞名的湖上, 去到中途船員仲會向山邊吹奏喇叭, 傳來的回音效果就好似合奏咁; 難得既係遊客雖然多, 但大家都好安靜咁欣賞四周湖光山色, 並沒有破壞環境的喧鬧; 湖好大, 中途在St. Bartholomä教堂上岸, 有露天餐廳, 大片草地同背後的德國第二高峰Watzmann, 呢個時候天氣放晴, 影相好靚; 兜個圈再上船去湖的盡頭Salet, 呢度落船向上行20分鐘就可以去到另一個湖Obersee, Obersee深入山中, 比國王湖水面更平靜, 個倒影近乎完美! 去完國王湖之後, 下午回到Salzburg, 在舊城區閒逛，到到莫扎特故居門外打個卡,同去超市補給(酒店連免費水都無)。夜晚就去一早已book好的莫扎特Concert Dinner; 我哋都唔係董得欣賞音樂既人, 嚟呢度雖謂附庸風雅, 但一場嚟到音樂王國奧地利, 食晚餐順便聽番場concert都算係感受下地道文化; 況且演出的都是著名曲目, 而環境亦都好grand, 可算係視覺+聽覺享受。 舟車勞頓加上整天的行程, 第二朝瞓到自然醒, 在Salzburg只剩一個行程, 就係市郊的海爾布倫宮(Schloss Hellbrunn); 呢個宮好低調, 隱沒在住宅區中間, 最吸引的莫過於入面既機關噴泉(保證濕身!), 此宮建於1619年, 以當時科技做到機械控制的噴泉一啲都唔簡單; 宮內另一景點係電影仙樂飄飄處處聞(Sound of Music)的場景玻璃涼亭, Salzburg除咗莫扎特, 最出名就係呢套經典大作既主要場景。
