L 先生一直都好想試吓玩大郵輪，對於我而言，連雙魚星都未去過，所以都好想試吓玩郵輪。適逢亞洲最大郵輪路過香港，有兩個月時間以香港作為母港，於是就安排呢個郵輪之旅作為L先生嘅慶生禮物。 起初一心諗住直接係郵輪官網訂應該最平最方便，但原來經本地嘅旅行社報會更平，更多優惠，出發前，仲有旅行社幫你print 晒所有登船所需文件，如果該旅行社賣房多的話，仲會有個"領隊"係船上解答你嘅問題添! 所以買package 前，記得格價。 我哋報咗海洋贊禮號越南5天(第6日晨早落船) 露台房package。Package 價3千多一人，如果你當呢個係機票+酒店，3千幾一人玩5天都真係算抵，仲包一日5餐。上船前都略有所聞香港出發嘅船會有好多「親愛的同胞」參加，下刪千字......再加上爬埋cruise critic, 所有老外嘅評論都係同「親愛的同胞」有關，我哋已有晒心理準備! 上船前記得問Agent 拎個booking reference no., 可以login 入去皇家加勒比個portal 預訂特式餐廳，活動，及岸上觀光團，同埋可以做埋online check-in 及掛credit card 作船上消費payment等等。 上船當日，其實佢嘅登船時間好長，由上午10:30至下午3:00前都可以登船。既然畀晒錢，請晒假，更係一早登船啦。登船過程都尚算順利，差不多11:30am 就已經過晒海關、入境，順利上到船上。上到船，冇第一時間聽crew staff 所講去自助餐廳食lunch，反而趁少人去咗service center confirm 我哋之前所預訂嘅嘢，同埋睇下有咩entertainment 要book 就一早book 晒佢，如要book 餐廳、岸上觀光等，係呢個時間book 都係最少人嘅。搞好晒之後先上去 Windjammer 自助餐廳食lunch。好彩早啲上船，晏咗自助餐廳超多人，要排長龍！ 食完lunch 後，剛好可以上房。我哋住嘅係露台房，房間長形，入到去先係浴室，浴室雖小，但絕對夠用，不過就冇乜浴室用品供應。再入就有衣櫃、大床、Sofa及電視，盡頭就係無敵海景露台。房間面積雖然唔係好大，但一切感覺都係舒服嘅。 放好行李，稍是執拾之後，約4:00pm就要去指定嘅集合點參加安全演習，所有人都要參加，成船4千幾人按房卡上編配好嘅地點報到，齊齊睇片。睇完片後就可以再次自由活動。我哋就去咗上North Star (呢個係香港水域上North Star 嘅time slot 要上到船先有，之前係官網portal 係唔見的)。 玩完North Star 之後，逛逛船上其他設施。佢有兩個主要表演場地: 5樓船尾嘅Two70，同埋4樓船頭嘅Theatre。Two70日頭冇表演時可以隨便坐，欣賞海景，仲有個輕食buffet 餐廳Cafe @ Two70，可食午餐及下午茶。15樓 有個multi purpose 嘅場地SeaPlex，不同時間feature 不同活動，個人覺得最有趣嘅係碰碰車！最後當然仲有14樓嘅泳池啦，佢有一個全露天泳池(老外最愛) 有一個室內泳池，仲有一個只限成人嘅室內浸水池 Solarium，有Jacuzzi 數個，又可望到室外大海，其實環境唔錯，但...大媽最愛！ 逛完船上主要設施後，就到咗食飯時間。食飯時間主要分為2輪：5:30pm 及7:30pm，船咭上已有寫明。如果要去Main Dinning Room 食的話，就要跟呢個時間入座，但去其他特式收費餐廳及WindJammer 自助餐廳就唔駛跟呢個時間，可按自己安排選擇。除咗WindJammer 自助餐廳外，4間免費Main Dinning Room 分別為 The Grande, Chic, American Icon Grill, Silk, 如係香港同大陸出發的行程，呢4間Dinning Room 食嘅Menu係一樣，分別只在於裝修。個人覺得WindJammer 質素就一般般，Main Dinning 嘅質素就都算OK。 免費餐廳外，我哋亦都食咗3間收費餐廳，食品質素同服務都比免費嘅好! 佢哋有個dinning package，一個套餐價錢，可以食3或4間收費餐廳，呢個Package 係抵嘅！點擊圖片放大 +3 除咗正餐，仲有好多小食餐廳及自費酒吧。個人覺得Pizza 店 Sorrento's 同埋熱狗店 SeaPlex Dog House 都好好食。自費酒吧每晚都有不同嘅live band 或歌手註場，而最得意嘅就係機械人酒吧Bionic。 岸上觀光方面，我哋沒有去到峴港，因2個月前已去過，打算留在船上relax。如果要去峴港或順化嘅話，我強烈建議參加船公司安排嘅觀光團，因為你跟本唔知點樣係個偏僻簡陋嘅碼頭到搵車入市區。 我哋只去咗芽莊閒逛，其實上岸時間好少，又要等駁船，參觀咗個教堂，食個lunch，去下超市，行下沙灘，就話夠鐘要返上船了...... 回程前一日，我哋參加咗一個廚房參觀活動，深入廚房重地，了解解決船上6千人胃口嘅廚房，呢個活動仲包咗一餐好精緻嘅午餐，絕對值得參加！ 最後，緊記要抽時間，於航行日欣賞一下美麗嘅日落！
