一年一度嘅Ocamp又黎啦! 一屆新生又要諗下報咩Ocamp同報幾多個Ocamp。諗起當年作為freshman參加，真係百感交集...... 8-O 一向怕怕羞羞嘅我，諗住襯依個時候，識番啲同學，返學有伴一齊上堂，一齊吃喝玩樂。結果就報咗兩個department 嘅Ocamp(俗稱中O)，一個標榜多人玩同「最」熱血，另一個就比較小型。 最後，兩個camp 俾我截然不同嘅感覺。 第一個camp，雖然係學科學會，但一組連同組爸媽有二十幾三十個人，整個camp有八組，算得上係大O。照道理應該好好玩，但對於pure嘅小小薯黎講，就被佢地嘅話題嚇親。傾嘅野都係關於啲男男女女、討論邊個女仔「正」等等，就連作嘅slogan都有啲不雅嘅用字，搞到我無法投入一齊玩。 不過，依類多人嘅Ocamp都幾值得玩同幾難忘，因為氣氛好，啲人玩得夠放，dem beat都有氣勢啲。作為大學新鮮人都可以體驗下咁大型嘅營會。但要有心理準備會有上述情況，如果唔係就好似小小薯咁覺得是一種衝擊。 第二個camp可以算係細O，每組得十個人到，冷冷清清咁，同第一個camp有好大對比。一開始入camp覺得有啲中伏，好想走。但玩咗一陣感覺就唔同咗，因為啲人講野斯文好多，同埋幾friendly，起碼搭到嘴，會同啲組員熟啲。組爸媽又會照顧到哂所有組仔女。至於玩嘅遊戲就同第一個camp大致相同，但每個遊戲都參與到，唔會出現太多人而有人冇得玩嘅情況。 如果真係想識幾個新朋友嘅話，細O係一個唔錯嘅選擇，人少少，易熟啲。加上通常玩嘅活動會比較健康，唔會太癲太過火，輕輕鬆鬆就玩完個camp。但就預咗活動有咁大型，同埋冇人多嗰種氣氛。 其實join咩類型嘅Ocamp都係要睇番自已嘅性格適合啲咩。但我就建議參加一大一細，體驗下兩種唔同嘅Ocamp，反正一生人一次。諗番起，我冇後悔參加咗依兩個camp，起碼俾我知道大學裡面會有啲咩人。 有啲咩關於大學嘅野都可以問下我，我解答到嘅一定會解答你ga~
