深水埗嘅拉麵店嘅數目認真唔少，而且各有賣點特色，最近就有一間主打鰹魚湯底嘅拉麵店加入戰團，就係鰹の一滴。 鰹の一滴其實之前已經喺隠家同俺の沾麵限量推出過，今次就索性獨立成舖咁推出喇。佢店舖嘅位置都幾偏僻下，雖然睇地址話係喺鴨寮街，但絕對唔近平時好多人行嗰帶，而係要過了楓樹街球場嘅一段鴨寮街，有啲近太子。 門口裝潢好簡約，一塊門簾上面印有一個鰹字。喺夜晚去時，周圍都冇咩舖頭開，憑住燈光好易就搵到。 基本上就係得基本鰹魚版「鰹之一滴」同黑松露「黑之一滴」揀，揀咗要唔要黑松露之後，就可以揀要唔要玉子或者要多啲叉燒，下面仲可以揀追加嘅topping。 今次就揀咗鰹魚湯底加玉子嘅拉麵。上嘅時候，叉燒上嘅鰹魚絲仲郁緊好吸引～ 麵條嘅粗幼適中，有咬口亦容易掛到湯汁 。而湯底都真係驚喜嘅，講起鰹魚湯底可能大家都會諗起台風，佢哋兩者都算各有特色。鰹の一滴嘅湯就真係液體嘅湯，好夠味而且係清甜嘅，個人就覺得食落冇台風咁濃味同鹹，咁就睇下你鍾意邊種風格喇～ 食拉麵啲叉燒最怕遇上好似煲湯瘦肉咁嘅叉燒。呢度嘅叉燒就唔會過瘦，有少少肥口感更滑！ 初頭叫玉子嘅時候以為只係得半邊，見到有一隻完整嘅暗暗驚喜咗一下。咬落去真係好流心，基本上差唔多成隻蛋黃都係流心狀態。 現場店舖仲有佢哋嘅材料賣，包括拉麵、鰹魚乾、鰹魚絲，連刨鰹魚乾嘅器具都有。初頭我望住成條嘅鰹魚乾，幻想唔到可以點食點處理，就問店員。原來係要買埋嗰個刨鰹魚乾嘅器具返去刨先得嘅～哦！真相大白。店員都話要自己刨咁麻煩，係囉我都同意，要食不如行過來食就算喇～ 以後喺深水埗搵食又多個選擇喇～ 鰹の一滴 深水埗鴨寮街28-36號運福樓地下B號舖
