有3款牛的部位，分別牛肩、牛扒、西冷，價錢由$70-220，重量會按200g, 300g, 400g，先到自助點餐機付款點餐，拿提示器搵位坐。最正係大部份都自助，所以無加一服務，真超正。 等待牛扒時，可自助添沙律、湯、飯及飲品。沙律菜好乾淨新鮮，而且保持微凍，有日式芝麻醬和和風醋汁選擇，前者芝麻香又滋味；後者微酸清爽開胃。 飲品有3款凍飲及熱茶，我揀洛神花山楂茶，酸酸甜甜又清涼解膩，仲有菊花茶及綠茶選擇。 麵豉湯夠哂熱，好溫和同唔算好咸，仲有d海帶，味道幾好。米飯都會時常refill，我添第二碗時都係熱辣辣同有米粒完好，牛扒最岩配米飯，吸哂牛肉汁，甘香油潤既味道。 由於牛肉無醃過，所以餐廳準備左即磨粉紅岩鹽同黑椒，仲有黑椒汁同照燒汁。 一切準備就緒，當可以取牛扒時，順便拎圍巾，因為熱石板真係煎到牛扒彈油，保護自己件衫最岩，餐廳的確細心，因為店員都有提客人用圍巾。 我點左牛肩肉 300g $110 小心拎走張紙，就可以開始進食。牛扒會以1成熟上菜，由客人利用熱石板煎熟牛扒，自己想幾成熟都得，完全自由，合哂心意。影完相，我都要快手切開牛扒，開始煎熟牛扒鎖住肉汁先，因為太慢牛扒就過熟。 個人喜歡切件煎好，一來方便再煎來食，二來無甘快熟哂，同埋熟得較平均。切開一粒粒牛肉，輕輕煎一下，就食得。熱辣辣有燒肉既香味好正，味道鮮嫩，牛肉有豐富肉汁，肉質結實得來帶點咬口，仲有脂肪既香味。簡單加鹽同黑椒已經好正，食到原有風味。沾燒汁味道更豐富，而黑椒汁亦香濃仲好惹味。
