今年母親節，除咗整咗個母親節蛋糕之外，仲提早買餸左一揪右一揪成個阿四咁預備幾味。回想細個嗰時，凡做節過新年或做冬，佢都獨自一人拎餸仲拎埋砂煲罌罉調味料搭車去阿嫲度⋯⋯ 佢點拎㗎？仲要煮成廿幾人份量，今日我就嘗試滋味，除咗個老火湯、炒菜同豆角粒粒炒蛋，我淨係煮咗栗子炆雞、黑椒和牛粒、黃金蝦、蜜糖雞翼、生炒骨，已經想話下次出街食算。 今年母親節，整咗個天使蛋糕，you are my angel - 紅苺吉士焦糖蛋糕。 今年母親節好難忘，個蛋糕俾媽咪入雪櫃嘅時候反轉咗，就變咗巴黎鐵塔反轉再反轉蛋糕，冇嬲，但超難忘。 點擊圖片放大 戚風蛋糕： 蛋黃 2隻 / 砂糖 35g / 水 2tbsp / 油 2tbsp / 低粉 70g / 發粉 5g / 雲呢拿香油少許 / 蛋白 3隻 / 砂糖 35g 忌廉： 淡忌廉100g / 甜忌廉 50g / 糖霜 20g / 雲呢拿香油少許 做法： 先打起蛋白及砂糖至挺身尖峰狀。 蛋黃及砂糖打約2分鐘，加入水及油份，以手打蛋器拌勻。 先加入少許蛋白，拌勻，再加入粉類，快手拌勻。 然後分次加入蛋白，拌勻。 入模，放入已預熱175度焗爐，焗約35-40分鐘。出焗，倒扣待涼。 橫切成兩份，備用。 打起淡忌廉、甜忌廉、糖霜及雲呢拿香油，放雪櫃備用。 吉士忌廉： 蛋黃 2隻 / 砂糖 20g / 牛奶 180g / 粟粉15g / 雲呢拿香油 少許 / 牛油 20g 蛋黃與砂糖以60度火隔熱拌勻，加入粟粉拌勻。 牛奶滾起至微熱。 將1/3牛奶倒入蛋黃漿內拌勻，再倒入2/3牛奶內煮至杰身。 待微涼後，逐少加入牛油拌勻，放雪櫃備用。 焦糖脆脆： 砂糖 80g / 粟膠 10g / 水 1tbsp / 梳打粉 1/2tsp 將砂糖、粟膠、水煮至130度至金黃色，熄火。加入梳打粉，快手拌勻，待涼。 組合： 將紅桑子果蓉塗抹蛋糕片上，用揤袋以打圈方式由內至外揤出吉士忌廉，放上切碎的焦糖脆脆，再放上蛋糕片。 將忌廉塗抹到蛋糕上，裝飾，完成。
