近期明洞新興一種甜品，就係草莓大福。當日大約十二點去到明洞，撞岩放飯時間，見到無論OL定Oppa都會拎住個大福細細品嘗。位置較近乙支路入口既車站，遠遠見到呢個草莓頭就係佢地特有既標誌喇，不過條路係人車並行，所以大家要小心小小喇。到達既時候已經見到大排長龍喇，好多都係一盒一盒咁拎走番公司食。不得不提，裝既盒十分靚架，都有草莓圖案係上面架！ 請支持我們 [ Little Corner ] 當日總共有4款口味可以選擇，有草莓，奇異果，橘子同芒果，全部都係即日做出黎架，每一個盛惠2000won。本來想食草莓同芒果，不過當日無芒果味，可能係唔岩季節喇。最後揀左草莓同橙味，仲有靚靚女店員拎俾你架！ 一啖咬落去之後，真係完粒草莓呀！仲有香香甜甜既豆沙餡加上一層麻糬皮，仲有出名好食既韓國草莓，真係一件令人好幸福既甜品呀！到試食橘子時間，橙肉十分甜，而且仲有好多橙汁係大福入面，都係十分好味道架！難怪一間小小既店舖會有咁多韓國人排隊。 草莓大福係邊度食到呢? 乙支路入口站6號出口，轉左手邊直行至第2個街口，會見到Mos burger之後向右轉，見到7－11既路繼續行入去，經過Innisfree就會見到係7－11同王妃家或者薯仔鍋中間。 係明洞站8號出口轉左一直向前行，留意左邊會經過M Plaza有大大間Forever 21，再繼續向前行，去到大十字路口會見到大間既Oliver Young，係旁邊路口直入，經過Ediya Coffee王妃家同薯仔鍋，旁邊就係喇！ 請俾個Like繼續支持同留意我地喇！ Little Corner Facebook: www.facebook.com/ohlittlecorner Instagram: ohlittlecorner
