終於有時間寫下個第3集啦 今次我地係時候出一下外島 北九州既貓島相對上出名 有藍島，相島，湯島等等 今次小編我所揀既係叫做保戶島 都係同樣係大分縣入面既 我地去外島就當然係要去搭船啦 而今次個碼頭就係津久見港到上高速船 費用一程為860YEN 船程大約係20分鐘左右 難得當日天氣好好 所以一落船，就見到好靚既風景啦 落船第1件事就係睇下呢個保戶島到底有咩好睇 所以就去左睇下個地圖先 係地圖入面，有推薦左幾個方案比大家行保戶島 我地分別向右下同左下方步行 右邊既地方係比較多貓貓既 由現在地行到去右下大約係15-20分鐘既路程 我地去片啦 我地先由現在地行左上島既中心，海德寺 沿路行上去，都係一大堆樓梯 真係少D心力同體力都搞唔掂 但抱住上到去就可以睇到好靚既景 要努力行上去 行到上去，其實個寺唔係太重點 因為真係用黎供奉故人 重點推比大家既係，佢開住海既景色 簡樸漁港既景色盡收眼底 無旅遊區既繁華 有時靜靜地睇下景已經好正 落番山再向地圖右下方向行走 沿路開始見到一堆堆既貓貓等緊我 仲見到有個伯伯將捕獲到既新鮮魚分比貓貓們享用 一向都覺得係各個貓島既主子們都好親近奴才們 就算我無野食係手 佢地都會行近你 停留係你附近 再繼續向前，其實好荒蕪 感覺好似發出任何聲音都會破壞當下的寧靜一樣 走到盡頭我地又行番轉頭，再同貓貓玩左一陣 一路沿路行番去現在地，但見未夠鐘食LUNCH 唯有再向左邊出發 話說又爬左一堆山路樓梯先上到去個加茂神社 本來諗住點都有D紅葉望下 點知又係得個桔XDD 不過都值我行上去望下既 回頭落黎，又見到靚景WO 行完神社就去左食LUNCH 而LUNCH就係島上其中一家餐廳既吞拿魚全宴 我會再係下一篇分享架 可以 按此 睇食評 食完之後，餐廳老闆帶左我地去做左件好爆既事 話說細心一看既話，會見到地圖左下方會有個位有條魚 個到其實係住左幾條好大既魔鬼魚 即係下圖個D 係水族館大家就見得佢多啦係咪 佢上水比你睇又試過未 島民會有一紮引魚仔過黎既內臟 拋落海等一陣就拉到條魚仔上黎比我地睇 之後，島民仲叫我地摸下佢 天呀，人生第一次摸佢 真心好HYPER又好驚，但島民話佢條尾係下面所以唔洗驚 玩完魚仔之後就差唔多夠鐘上船番津久見港啦 老闆仲好好咁等我地上船開船先走 津久見港 <-> 保戶島 船程班次 官方網址: https://www.hotojima.com/ 想番去睇下偽。本地人深度遊個總覽 可以 按此 想問多D既話歡迎用以下途徑搵我 Email: choitsz_wing@yahoo.com.hk Facebook: littlecongi分享地攤 Line: ck6057 Instagram: little_congi / congi_store
