第二日一大早我地就趕去市政府站搭首都客運1570去宜蘭喇 當日我地搭7:30am個班. 需要早少少到買車飛. 搭紅色/綠色線 (星期六, 日先有) 都可以去到羅東轉運站. 但要留意藍色線只去到宜蘭轉運站. 5:55am就已經有首班車. 亦都可以係台北轉運站搭葛瑪蘭客運. 睇下邊個站方便自己 圖片來源:首都客運 市政府去羅東只需要1小時. 單程twd120 大約8:30就到羅東轉運站喇. 之後就要即刻去國光客運既counter度買來回太平山車飛 一日只有一班車 8:50去程 15:30回程 來回twd360 因為我地係台北黎. 要先行去對面既羅東火車站寄存行理. 因為寄存行理既地方係另一面. 先上電梯去一樓->行到最入會有架lift落番去地下->出lift左手邊就會見到 一個handcarry 只需要twd50 可以放到晚上8:00 羅東去太平山來回需要twd260. 仲要係星期六同日先有車. 除左自駕遊就只有呢個方式了. 8:50 上車. 10:00已經到左土埸 (應該係太平山山腳). 需要先落車買門票. 再上車.. 之後既山路真係好難捱..不停轉上山. 建議先食暈浪丸..但係沿路既風景真係好靚. 因為太平山海拔2000公尺. 所以你會見到d雲層穿插係山中間. 最好就係坐右手邊! 當日我地去到係唔好天. 仲要落雨..所以都幾凍. 需要帶件可以擋風擋雨既外套. 其實黎太平山真係最好就自駕遊. 因為一日係行唔哂. 亦都冇得睇楓葉..即使我地去個陣係賞楓時期, 但係只有台灣山毛櫸步道先可以睇到楓葉. 圖片來源: 太平山 如果係一日遊又唔係自駕, 就只有以下呢個選擇喇 先去雲海咖啡館食吐司同飲杯熱飲. 咖啡館入面係可以望到好靚既太平山景. 之後可以行原始森林步道同鐵杉林自然步道. 先要行差唔多500級樓梯..我地預左2點半左右就要開始落山. 因為怕miss左唯一既車. 我地未能完成整條鐵杉林自然步道. 因為花左好多時間停低影相. 但如果你不停行. 係可以行得哂既. 太平山有好多奇型怪狀既樹. 加上當日好大霧. 有種入左幽靈公主森林既感覺. 點擊圖片放大 本來想坐蹦蹦小火車. 但係個陣時間暫停了. 去之前建議先上官網睇清楚. 回程既路上都係十分難捱. 好多乘客都要落車嘔.. 番羅東轉運站途中會經過羅東夜市. 6點就會到達羅東夜市. 夜市有多好味既小食. 全部都唔錯. 只要跟住排隊就啱XD 而且仲有好多買衫既小店. 好好行. 點擊圖片放大 好值得推薦既係三星蔥豬肉串. 宜蘭最出名三星蔥同五花肉就係好夾! 好多旅遊節目介紹過雞蛋糕. 但個人覺得香港人唔使試喇. 根本係普通既雞蛋仔-_- 下面既三星蔥肉包都好好食!仲要好juicy! 之後行番去羅東轉運站拎行理. 再搭火車去礁溪民宿. 如果你係有悠遊卡(姐係八達通) 可以唔使排隊買車飛. 咁會平好多. 但就冇得坐 (其實可以坐冇人既位). 同埋1,2個位就到. 企下都okay 去民宿途中見到間賣辣椒雪糕店. 有唔同既辣度可以揀. 但因朋友冇興趣就冇試到:( 不得不介紹一間好好食既手信店 - 奕順軒 如果佢唔係我地民宿對面我地都唔知咁好食. 店內差唔多所有食品都有得試味. 經過一輪試味, 最最最好食既係切達乳酪餅 cheese加麻糬簡直係絕配!!!!! 雪凍左唔雪凍都好食. 煙煙銀銀. 口感一流. 好後悔冇買多幾盒. 圖片來源: 奕順軒 三星蔥蛋卷都好食. 好香. 但因為怕碎冇買到. 奕順軒只係得羅東, 礁溪 同宜蘭先有門市..黎宜蘭必買! 其實點解會揀礁溪住係想浸溫泉. 民宿老闆同我地講只要較去熱水就已經係溫泉水. 但我地發覺民宿係一棟私人大廈. 而民宿老闆話每間房都有得浸溫泉. 心諗有冇咁多溫泉水. 放水入浴缸時候, 發現一d都冇硫磺味. 事後問番當地人佢地話礁溪好耐已經冇哂溫泉. 因為好多人不停用. 只有山上既溫泉酒店先有可能有真正既溫泉水. 所以大家都唔好俾人呃. 住羅東或宜蘭會平d又多野行. 礁溪真係咩都冇.. 第3日會去宜蘭搵幾米!
