一知道Mango Tree係香港開店已經想嚟試,可惜一直就唔到時間,呢日碰巧嚟到圓方,二話不說嚟食。夜晚7點幾門口就企左10幾人,好彩餐廳夠大,等左15-20分鐘度就入得。 入面以淡綠色及原木色裝修為主,感覺舒服,有度假feel。 我地都唔太肚餓,所以主要叫左啲串燒同沙律︰青芒果軟殼蟹沙律$148軟殼蟹份量都幾多,炸得好香脆,下面嘅青芒果爽得嚟有啲似蒟蒻,沾埋醬汁酸酸地好開胃。 泰式炸蝦餅(3件) $88估唔到炸蝦餅都咁彈牙! 雞、豬、牛沙爹串 $138雞、豬、牛沙爹各2串,牛肉燒得好嫩,不過雞肉較乾身。有兩款醬可沾,橙色沙爹甜甜地好香椰汁味,另一款就偏酸微辣。 香芒糯米飯 $98全晚最期待嘅就係芒果糯米飯!之前係泰國食過覺得好好食,不過係香港食就貴好多。但係質素都幾好,糯米好香軟無粒粒,芒果好清甜、唔酸。如果可以有多啲椰汁沾就好啦~ Lychee Smash $70當晚見到有4款飲品做緊推廣,每叫一杯可用$10加多杯,所以我地叫左荔枝特飲(無酒精)試下。杯飲品好靚,入面有好多薄荷葉,飲落好清新、涼涼地。而且唔會太甜,飲到有荔枝味。 總括嚟講係圓方食野呢個價錢唔貴,雖質素唔錯,但可以有好多其他選擇。 Mango Tree*****如果你覺得食評都幾中肯,歡迎多多支持並追蹤︰Instagram: https://instagram.com/risrisophy?igshid=dssksxpx7r2m