其實我對東南亞菜系都好中意，越南菜更係繼泰國菜後又一喜愛菜系。尋晚就同男友去左間位於工廈樓上嘅越南菜。本身對工廈環境都無咩期望，不過去到見到真係有驚喜！個環境好光亮整潔，而且枱櫈都帶有點點嘅法式風味。 我地見椰青海鮮湯 ($88) 好似好吸引，所以叫左試下。果然一上枱就聞到好香椰子味，而且個湯飲落好清甜，不過由於有黑胡椒，略帶微辣。入面有魷魚、青口、椰肉同一隻大虎蝦，質素唔錯。 小食拼盤 ($138) 有扎肉、雞翼、牛肉、豬頸肉、魚餅、春卷等。每樣都好新鮮，牛肉唔會韌，好鬆軟; 魚餅好大一塊，好厚身，表面煎到金黃色; 豬頸肉肥瘦適中，好爽口; 春卷表皮好酥脆，入面餡料口感豐富; 雞翼不過不失。 越南法包 ($55) 都係第一次食，以為會好乾好韌，點知一咬落去個麵包表皮好酥脆，入面好軟身。而且餡料好豐富，有牛肉、扎肉同好似係鵝肝醬嘅醬，食落口感好豐富兼帶少少濕潤感。 呢杯越南雞蛋咖啡 ($36) 也是令人意外之物，估唔到蛋黃加係咖啡上面一齊飲，口感會咁creamy同滑溜！不過要留意嘅係唔好煲咁耐，咖啡會愈煲愈濃而蛋會凝固。 男友話呢杯越南咖啡 ($26) 味道香濃好好飲。 整體黎講價錢唔係特別平，不過味道同餐廳環境都好好，值得推介。 峴港越式料理: 觀塘成業街15-17號成運工業大廈1樓3號舖
