其實小妹對屯門真係唔熟，平時都係去開V City 搵食多。呢日朋友話有間泰國菜好似唔錯食，於是叫我去試下。 間餐廳位於置樂，地點唔太方便，好彩我地有車去。 雖然我地去果日係星期五，但竟然唔全好多人，都幾多空位。 我地叫左泰式生海蝦 ($168) 做餐前小食。本身以為係一個圓碟上面擺放生蝦，點知係用小杯一隻隻咁裝住，present得好靚，好啱食之前打下卡！ 而且仲有兩種口味，有辣有唔辣，任君選擇。辣嘅酸酸甜甜，好開胃；而綠色唔辣嘅就好香香草味，好清新! 跟住主菜方面，我地叫左泰式明爐香檸汁尖吻魚 ($138)，侍應一捧過黎就聞到好香嘅甜酸味，中間更滲透著青檸嘅清香。我地急不及待試食，魚肉真係好嫩滑，而且甜酸味道剛好，唔會蓋過魚本身嘅道道，反而突出佢嘅鮮甜。魚肉下面有粉絲，吸收晒湯汁嘅精華。係食厭左烤魚外一個唔錯嘅選擇！ 本身對炒金邊粉無咩期望，不過佢呢個網包鮮蝦炒金邊粉 ($78) 真係好香，金邊粉唔會硬身，而且賣相好靚！ 驚唔夠飽下，我地叫左個象泰招牌去骨豬手煲 ($98)。估唔到係咁大煲，勁多豬手，而且豬手煮到好淋，醬汁都起晒膠。味道唔辣，更似係紅燒。 估唔到屯門都有咁高質嘅泰國菜! 象泰宴: 屯門青善街康景花園8-10號舖
