上星期小妹同兩個閏蜜朋友去左泰國,見近排咁流行去烹飪學校學煮野食,於是我地未出發之前就預約定。其實泰國有好幾間酒店都有提供烹飪課程,不過價錢比較貴,我地揀左坊間較小型嘅烹飪學校 - Silom Thai Cooking School,價錢比較平,可以學煮5個courses,另有早午晚三個時段可以選擇。由於我地港女們驚熱,所以揀左晚間時段。 係預約嘅時候,烹飪學校會用電郵好清楚咁交代去學校嘅路線(有youtube video),仲會提供泰文地址俾我地搭的士用,好貼心。 當日我地5點幾去到。教室分兩層,下面果層主要係俾導師作講解用,而且有兩張大枱讓同學仔煮完野食試食用;上面果層係廚房,我地切完材料就拎到上面煮。估唔到嘅係教室嘅設計比我想像中精緻,好似間cafe咁,不過我地一去到就洗手準備開始,影嘅相唔多。 我地果日煮嘅5個菜式係: 冬陰功湯 泰式炒金邊粉 泰式雞肉生菜(我地果日係用椰菜)包 雞肉綠咖哩 芒果糯米飯 材料已紅好靚靚同整齊咁擺晒出黎。而且每轉一道菜式,個陣都會唔同。 點擊圖片放大 跟住導師好詳細咁講解每樣材料嘅特性,仲會整爛少少俾我地聞下。 聽完詳細嘅介紹之後,我地就開始切切切、炒炒炒嘅工作。 係煮緊嘅時候,導師都會好仔細咁幫我地睇下火,再加下少少調味料。 每煮完一道菜式之後,我地都會拎返落一樓試下自己手藝,然後再煮下一道。依加同大家分享下我嘅製成品啦!味道好地道,加上自己煮真係好味D。 冬陰功湯 泰式炒金邊粉 泰式雞肉生菜包 雞肉綠咖哩 芒果糯米飯 成個課程二百幾蚊,可以整5道菜式,CP值高!如果去曼谷可以玩下、體驗下。不過星期一至日教嘅菜式都唔同,報名之前可以上官網睇清楚。 Silom Thai Cooking School