今日要介紹一間好適合同朋友談天說地,消磨時間嘅餐廳 - 荳子。 小妹兩位友人都係住將軍澳,所以我地通常聚會嘅地點都係將軍澳或者寶琳。呢日,佢地提議去位於popcorn商場嘅荳子聚聚。 我地七點半到,人龍唔算長,等左20分鐘左右就入到去,仲要係窗邊位,感覺幾唔錯。 我地3個人叫左半份ribs share,估唔到都幾大份,每人食到2條。除左下面嘅薯條同沙律菜外有碟醬汁同沙律配食。Ribs都幾多肉食,燒得唔錯,肉唔會'鞋'。 我最中意呢個黑松露軟殻蟹意粉,除左因為佢擺盤好靚之外,主要係黑松露味道濃郁突出,食落香味徘徊口腔久久不散,而且軟殻蟹同幾種菇類一齊食,口感好豐富,絕對推薦! 本身我自己唔太中意食pizza,因為成日食果d都好乾身,但呢個pizza令我改觀!pizza邊好脆身,中間嘅麵包軟熟,襯埋上面蟹棒、蟹籽等配料,食落唔會乾,仲有d汁,真係好好味!食兩塊都唔會多! 係食野之前友人3番4次強調要食甜品,仲話呢間餐廳最出名甜品喎~咁佢嘅選擇又真係好多,睇左好耐,我簡左紅桑子醬玫瑰雲呢拿吉士拿破侖。一上台,個碟真係好吸精,估唔到presentation咁靚! 拿破侖嘅味道唔錯,濃郁玫瑰花香配上甜度適中,質地滑溜嘅吉士,食落都幾清新,有春天嘅感覺(雖然依加係夏天) 友人叫左香草綠茶梳乎厘,佢嘅size比想像中大大大...... 雖然食落都係空氣咁,不過充滿綠茶香味,大家都停唔到口。 除左甜品,相信 好多人呢度嘅目的都係為左彩虹拿鐵!我都唔例外,被佢嘅樣子吸引。其實本身我睇唔到個圖案係咩,經友人提點先見到原來係玫瑰花,拿鐵味道與一般的差不多,價錢略嫌貴左少少。 很喜歡餐廳嘅木質餐具,令整個用餐體驗提高左質感! 點擊圖片放大 可怕美中不足嘅係d台比較細,擺晒野食,就無位擺飲品。