由我讀完書出來工作後，想參加游泳班學游水，到學識游水(在成人池游50米)，前後都經過N年。期間花了大量時間上網搵資料，睇youtube,都係學唔識。到後來決心參加游泳班，跟教練學，期間一直困擾我，令我在淺水唔識浮、深水唔識游，都似乎係同一個原因。每個人想學游水的原因可能不同，我發現好似我咁，唔識游水，唔想比人知，又想學識游水的人很多。我將自己的經驗寫出來，希望對想學游水的人有幫助。大家可以參考 我一個月學識游水的經驗，過程是非常、非常、非常艱辛，希望大家能從文字都感受到。上網學游水—成人的方法現代流行上網，包括上網搵資料、睇youtube學游水，這些我當然做過。上網過程中，的確令你學咗好多游水的知識。除了睇，我自己都曾經去泳池實踐，帶住電話去泳池，跟著youtube來做都試過。睇了幾年，到最後自己仍然唔識浮喺水面。網上有教人浮身的技巧，包括頭要望向池底、收起肚腩.....等等，我未學游水前都試過。對一些已經不怕水的人士，或有一些基礎的人士，可能會有效。對於怕水的人士，或因為緊張身體未放鬆的人士，這些方法都沒有用。因為你緊張時，身體就會僵硬，僵硬便會向下沉。我的經驗係，緊張的心理問題一日未解決，所有方法都有點多餘。上網睇得多，有一天突然諗到，以前嘅人睇書學游水，我都笑過這些人傻傻地。現在上網、睇youtube學游水，同以前睇書學游水嘅人好似差唔多，自己都覺得自己傻傻地。最後，我仍然上網，改為搵合適嘅成人游泳班。游泳班，第一堂淺水唔識浮?點克服第一堂初學游水，喺淺水區。阿sir教我哋做浮身動作，第一步就係吸一大口氣，放鬆，扶池邊，眼望池底，好多同學好快就浮到，只有我一個唔識浮。阿sir初時叫我放鬆啲，唔好咁緊張。我知道自己好緊張，但真係放鬆唔到。我同阿sir講，吸氣會唔會無效? 阿sir話唔會，人吸咗氣，就好似吹咗氣嘅水泡，一定會浮喺水面(後嚟我哋學背泳浮喺度，佢又講返呢個比喻)。我再嘗試浮起時，阿sir掂我的手臂和小腿，知道我成身硬晒。當我企返喺度，佢叫我掂自己手臂感覺下，當然唔會硬。跟著佢又講咗個比喻，話成身硬到好似石頭咁，當然好似石頭咁沉，唔會識浮。阿sir叫我鼓起勇氣，勇敢啲，個腦唔好諗咁多嘢。跟住不停同我講好多鼓勵嘅說話，我都唔記得佢講過啲咩，只記得不斷咁試，唔好諗嘢、唔好理耳仔入水等等。後來，我覺得自己開始浮到，練下練下，仲做到少少自由式踼腳，咁就完咗第一堂。阿sir話我未完全放鬆，叫我抽時間再練，否則影響之後嘅進度。我覺得已經好掂，因為成世人都未浮起過，已經有好大進步，好滿足，當然無再抽時間練。第二堂練習踼腳，我半浮半沉，一直浮唔到喺水面。阿sir知道我仲有啲緊張，佢掂我隻手臂，當然仲有啲硬。阿sir叫我再放鬆啲，我都係做唔到。終於鼓起好大勇氣，細細聲同阿sir講，我知道要放鬆，但喺唔知點放鬆。點知阿sir話你講咩，聽唔到。當時覺得好鬼瘀，好在冇人喺身邊，只好再講多次。阿sir話，方法都係咁，勇敢啲，個腦唔好諗嘢，專注做好動作，令身體放鬆。雖然我做到踼腳，全班同學中游得最慢就係我。就係因為咁，第二堂之後，我就上堂之外再抽時間練習。要放鬆，並唔係三、兩堂可做到。當我能游短距離時，我以為自己做到了，直至到深水池練習，我才發現自己未學識放鬆。深水唔識游?點解決有一堂上到一半，阿sir突然話到深水池練習。望住深水池，我初學游水時嘅緊張感覺又突然出現。我表面仍很鎮定，落深水池時，自己感覺到手、腳開始有點硬。開始時扶住池邊練咗呼吸，有同學可以在深水池游了一段距離，但游了很短的距離。由於我手、腳都有點硬了，基本浮喺水面都做唔到。有同學問阿sir, 是否我哋唔識踩水，所以咁緊張。阿sir話無關係，跟著指住另一位同學話，這位同學游蛙式，能踩水幾下，但一樣好緊張。阿sir話很多人以為識踩水便是萬能，其實踩水好吃力，游水反而唔會用咁多力。我是學自由式，唔知係唔係。後來，學蛙式的同學都非常同意阿sir嘅講法。所以，要在標準池游到50米，唔一定要識踩水。我自己好清楚，喺深水池突然變咗唔識游，係因為望到池底好深，自己好緊張。要克服呢種緊張，當然好似上堂咁，經常到深水池練習，練多幾次，自然無咁緊張。另一個方法，就係自己要放鬆。放鬆有好多方法，第一，自己要鼓起勇氣去練，練得多一定有用。第二要個腦唔諗嘢，自己要專注。係完全唔諗嘢，即係連緊張的念頭都放低。再加上教練嘅鼓勵，有時又不斷催促，令自己更易專注。泳班以外，我自己曾經抽時間到深水池練，係有啲用。但自己一個人練，好容易便停下來，也不知道自己做得好唔好。在游泳班練，一齊學有一種氣氛，自己更容易投入。最重要係，上堂時有教練即時指出自己要改善之處，加上阿sir一時鼓勵和催促，係令自己更容易進步。總結:開始學游水時，淺水唔識浮，係緊張。學會游短距離後，到深水池會變成深水唔識游，這也是緊張。要克服心理上的緊張，係我學游水時最困難之處，也可能係細個學唔識游水嘅原因。
