好多人話，小朋友學游水係最好。我細細個已經學游水，但是，我都唔記得參加幾多次游泳班，只記得好怕水，學好耐，學極都唔識，後來冇繼續學。做咗嘢咁多年，每逢夏天朋友、同事約出去游水或任何形式水上活動，一直都想盡辦法話自己唔得閒。如果推唔到，只好臨時話屋企有事，嚟唔到，就係唔想開口講自己唔識游水。學游水 邊度學?邊間好? 太吸引、最平游泳班都唔適合我今年我下定決心要學識游水，睇咗好多資料，有啲宣傳話輕輕鬆鬆學識游水，有啲話包學識游水、有啲話幾堂可以學識游一種泳式，呢啲游泳班對我完全無吸引力。如果咁容易，我早就學識咗。而且，N年前我已經開始睇youtube, 睇咗N個video，去泳池試過都唔成功。朋友學游水，我又借啲意問下學成成點?跟邊間學?工聯會有成人游泳班、政府康文署都有成人游泳班，呢兩間嘅共通點就係平，係好平。左搵右搵，比我我搵到個似樣啲嘅成人游泳班，有興趣可以自己click入去睇下。學游水-要學幾耐?我的上堂經歷(雖然無血，但一定有汗)第一堂就畀個阿sir嚇親，佢話成人游泳班嘅目標係要喺大人池游50米。我同阿sir講，我初學㗎。點知佢話大部分嚟學游水嘅人，都係初學。仲同我哋喺呢個月要抽多啲時間練習，才會學識游水。阿sir又話上堂時間唔會做熱身同拉筋，叫我哋平時安排時間自己做，佢會將上堂嘅時間大部分用嚟教游水。我無所謂，起碼唔使畀人睇到自己拉唔到筋。第一堂我可以將個頭浸咗落水，自己仲識浮喺水面，似乎解決咗我童年學游水啲困難。跟住開始學踢腳，最後游到少少，都唔錯，有番啲信心。第二堂開始， 阿sir就講下啲游水理論，示範咗動作，原來喺蘋果樹下，比蘋果扑親個頭嗰位牛生(牛頓)，佢啲理論同游水有關係。跟住就叫我哋游。游游下，我話好攰呀!點知阿sir話返屋企先休息，繼續。第二堂學嗰啲乜，唔係好記得。只係記得佢不停咁叫我哋：繼續，加油。結果返到屋企，周身骨痛，好快瞓著咗。感覺距離學識游水，又近咗啲。第三堂，上到一半，我忍唔住，好認真同阿sir講，真係好攰，頂唔順啦。阿sir話好啦，咁休息下。跟住叫我哋攬住塊浮板瞓喺水度，好似瞓覺咁。大家都覺得唔work，肯定會沉。 阿sir話人吸咗氣，好似水泡咁，一定會浮，又好似好有道理。試咗十幾廿次，嚇餐飽，有個女同學仲驚到大叫，比周圍啲人望住。我同另外兩個同學居然可以攬住塊浮板瞓喺水度。後來，我同阿sir講：阿sir呢啲好似唔係休息喎。佢話游泳班嘅休息，就係咁㗎啦。咁都得!不過算啦，學多樣嘢。都唔記得第幾堂開始，游咗大半。阿sir突然話：走啦，過隔離。成班同學都唔知去邊，只係跟住阿sir行咗去大人池。有嗰同學仔同阿sir講，呢度水好深喎，企唔到。阿sir話，我哋喺水面游，又唔係喺水底游，水深啲有乜所謂。水深啲，水壓大啲，人都易浮啲，講到好似好有道理咁。不過，大家都好驚，你眼望我眼。原來落去練下呼吸，同埋簡單嘅自救，估唔到我又做到，一生人第一次到大人池，到此一游，有啲成功感。呢個月我除咗上堂之外，重抽好多時間自己練。第一個感覺就係周身骨痛，返到屋企好好瞓。第二個感覺係自己不斷進步，越嚟越有信心能夠學識游水，游到50米。最後幾堂，經常去大人池練習，每次都係差啲，都游唔到50米。阿sir話由0到第一個50米係好困難，叫我哋要堅持，唔好放棄。我都堅持咗好多次，都係唔成功，曾經諗過放棄，究竟自己會唔會學識游水，會唔會又好似細個嗰陣咁？我真係好想學識游水，唔想衰收尾。尾二嗰堂，終於畀我游到第一個50米，我以為成功咗，學識游水，可以畢業。點知阿sir叫我游返轉頭，呢次太攰，我頂唔順，游咗10幾米就掹住池邊，之後好似初學咁，掹好多次池邊先游到返轉頭。阿sir話係正常，叫我下堂繼續努力再試，因為學游水唔會游完50米就走，要能夠游多次。 返屋企諗咗好耐，我決定最後嗰堂要留力，準備再挑戰來回50米。學識游水了，好攰、好開心最後嗰堂，我決心要做復仇者聯盟，再挑戰自己。第一次成功咗，游到第一個50米。游完後，阿sir冇催我，反而叫我休息耐啲，準備游第二個50米。好在，我都有留力。休息下，突然間心血來潮，鼓起勇氣，自己就沖咗出去，成敗一刻就咁開始。游返去時，中途好似比個阿伯阻住，我又飲咗幾淡水，我都唔得閒理咁多，只知好攰，真係好攰。我一直死游爛游，都唔知游咗幾耐。後嚟見到泳池底個十字位，記得阿sir講過距離池邊有2米，我知就快到，死都忍住、繼續游，終於比我游到池邊。原來，最後嗰幾米，阿sir叫啲同學仔同我開路，唔比人阻住我，大家都見到我游得好辛苦，以為我會頂唔順。最後，大家拍手話我成功咗。我自己都估唔到，能夠來回游到50米。雖然，我知道姿勢唔係咁好，但總算成功咗，學識游水。能夠來回游到50米，我已經成功咗，學識游水，好有成功感。學游水，一個月係可以學識。估唔到以前學極唔識，今次一個月攪掂，不過，真係要有好大決心。學游水方法--後記有啲朋友睇完，都感受唔到我學游水啲努力及困難。我後來諗，的確有一些困難我沒有提及。之後，我寫咗一篇: 淺水唔識浮、深水唔識游，呢篇係解決學游水時要克服自己心理障礙的方法。我嘗試重點、詳細整理出嚟比大家參考。當然，有教練指導下係好重要，否則，好似我以前咁，上網學游水，當然係學唔識游泳。睇完有咩問題，歡迎再聯絡我。
