由上一篇到依家已經一個月喇，一直想寫啲嘢，但唔知寫咩好。－.－ 今日終於的起心肝上嚟寫返啲嘢，等大家知道我哋仲在生咁啦。XD 有睇我哋之前文章嘅應該都知我哋已經喺8月7號出發遠走德國，而我哋就選擇咗法蘭克福附近嘅一個小城市烏辛根做我哋第一個落腳點喇。初到埗呢個星期基本上都係適應下環境，買下日常用品之類啦。 初嚟報到，第一時間梗係即刻去我哋間Apartment啦。大就唔算太大，但兩個人住夠晒啦。仲要設備齊全，洗衣機，電視，Wifi，煮食工具都有齊晒。 點擊圖片放大 +2 由於語言問題，有好多嘢都要自己摸，上網搵或者估估下咁攪掂。唔講唔知（可能係得我唔知），德國嘅窗係有兩種開法嘅。 一種係好似香港嘅開法，但係向內開嘅，手把呈3點方向。 另一種係咁開嘅，手把呈12點方向。（係同一個窗嚟） 閂窗就手把呈6點方向上鎖。 除咗窗，好多屋嘅窗外面都有一個Rolladen。（話說我哋都摸咗一陣先識放佢落嚟） 窗旁邊有條帶嘅，向下拉係升佢上去，但要放佢落嚟就要向下再向內拉，等條帶鬆咗再一路向上拉一路放條帶。 到埗後第一個遇到嘅問題就係個喺國泰買嘅轉插，個插蘇位竟然用唔到，剩係用到USB位，我哋仲要無帶spare。 問完人知道大型電子鋪 SATURN有得賣，上網知道近近哋嘅 Bad Homburg有，就諗住去望下啦。 Bad Homburg連個火車站都靚過人，不愧為德國其中一個富豪區。 出咗車站，準備過馬路，兩個傻瓜等咗好耐，跟住有個途人行過同我哋講，原來有個好似香港嘅行人過路燈要撳嘅（當然個途人係講德文啦，大概意思係咁啦，應該係）。我諗如果無人同我哋講，我哋絕對會繼續等。 上面個箭咀係指示行人路嘅方向。另外仲見過幾款唔同樣嘅，有一款係無得撳嘅。 去到SATURN門口，因為係星期日，係無開門嘅。雖然知道德國嘅星期日係休息日，但無諗到係咁徹底，得返少量餐廳有開，唯有第二日再嚟啦。 第二日終於都喺SATURN買到個轉插喇，盛惠7,99大元。（真係好後悔無喺鴨記買定幾個過嚟。。。） 總算解決咗一個問題啦，嚟緊肯定仲會有無數嘅問題出現，不過我相信兩個人無咩攪唔掂嘅！ 路
