星期日有好朋友帶我去食好野 -紅磡生記茶餐廳 唔好以為佢真係茶餐廳 , 佢夜晚係食小菜。 第一樣更係佢地既招牌菜 -蟹粥 啦 , 真係鮮甜 , 我相信佢地係將隻蟹斬完之後立即放入煲粥度原煲滾起 , 咁 d 蟹味就完完全全留番晒係 d 粥度 , 不得不提既就係 d 蟹好多膏 , 如果有人食過十幾年前澳門既 誠昌 , 我相信呢度可以尋回昔日味道。話就話呢兜野 2 人份 , 但 3 個人食先最好囉 , 唔係好易飽晒。 第二樣 炸八爪魚丸 , 第一啖咬落去 , 就知道有幾彈牙 , 而外面薄薄既皮好脆 , 入面就有好多大大粒八爪魚肉 , 正 , 分別有6粒同12粒叫 第三樣 蠔仔春卷 , 一樣係外皮脆到不得了 , 粒蠔仔仍然保持到有肉汁 , 蠔味香濃 , 最少可以叫 2 條 , 人少少叫岩岩好。 第四樣 聖子 , 真係好大條 , 大約有手掌加埋 d 手指咁長 , 仲要係買 4 送 1 , 有冇咁低 , 而食蒸呢 d 貝殼類既海產 , 食之前第一件事就係飲啖係個殼度果 d 汁 , 嘩 , 真係鮮甜到你唔信 , 之後食埋 d 肉 , 你就知道頭先果 d 汁 , 真係由 d 肉滲出黎。 第五樣 冬蔭功蜆 , 份量都唔少 , 我唔太食辣 , 但個香味都夠香 , 我覺得佢地將原本落大蝦既冬蔭功 , 改為落大量既蜆 , 所以鮮味有過之而無不及。 第六樣 芝麻酥炸雞軟骨 , 呢碟野黎到感覺有少少反高潮 , 因為最細兜係佢 , 但睇番價錢 , 咁既份量係唔錯 , 而佢地粒粒都好大粒 , 比起出面果 d 真係大一倍 , 雞味都比出面果 d 突出 , 食到呢度要讚下佢地 d 炸野真係一流 , 3樣都係外脆內嫩。 第七樣 豉油王炒面 , 細細個已經食既一樣野 , 係呢度我先知道咩叫炒面 , 即叫即炒已經不在話下 , 仲要又平又大碟 , 再加埋好味呢下真係驚喜 , 佢炒得香而不燶 , 而且食落口係有淡淡既豉油味 , 我真係食左大半碟。 第八樣只係普通既 油菜 一碟 , 又係大大碟 , 只係油太多 , 但 d 菜都係好甜既。 食得咁開心, 冇理由唔浪漫一下 , 都好低飲架。 而呢度埋單都只係五百幾 , 食海鮮真係可以唔駛去新界區啦。 生記茶餐廳 地址: 紅磡老龍坑街13號地下 如想更快知道我的分享, 歡迎讚好我的專頁 & Instagram 多謝支持 :-D My Blog: leung3siu.blogspot.com