每隔幾個月總會想食放題一次，唔係自己想食，就係朋友想食。 一向都知極尚大喜屋嘅食物款式多選擇，今次只重點介紹幾款之前未食過嘅，同埋個人嘅必食選擇。新品有 --焦糖牛奶鵝肝壽司: 朋友話呢款係最近壽司郎嘅大熱壽司，原來呢度都有。我食完一啖都即刻同朋友講要嚟多round，真係好好食，件鵝肝面因為灑了糖做焦糖效果，鹹中帶甜嘅味道已經好吸引，而未完全融化嘅糖同埋已成焦嘅糖，令到件鵝肝多了一重香脆嘅口感。平時食鵝肝都係配多士，今次配上壽司飯同食，原來都可以好夾，而且飯粒索了鵝油嘅香味，入口就更香。 咖喱大頭蝦: 驚喜位係個咖喱汁做得幾出色，咖喱味香濃，而味道更近似日本咖喱帶有鮮甜味，朋友話如果可以叫個白飯撈汁食就perfect，真可惜呢度沒有白飯供應。 個人選擇推介--海膽手卷、海膽魚籽拖羅蓉最中餅呢度食嘅放題海膽都可以呈現鮮嫩橙色，入口仲要係微微嘅鮮甜，正！海膽魚籽拖羅蓉最中餅，睇完名加相都唔係好清楚咩係最中餅（之後上網查下，原來最中餅係日本嘅人氣甜點），上枱時，驟眼看都仍然唔知係咩嚟，仲懷疑個似碟仔果塊嘢食唔食得。輕輕一咬，原來口感似雪糕筒果種威化，但無果種甜味，配埋海膽、拖羅蓉食，感覺更突出了刺身嘅海水鮮味。 避風塘炒蟹細細碗有齊蟹殼、蟹鉗、蟹腳。蟹鉗仲要幾大隻厚肉。避風塘醬料又係做得好出色，夠晒香脆惹味，呢個時候如果有碗公仔麵撈嚟食就好啦，可惜又係無🤣 鮑魚想輕易回本，緊係要叫鮑魚啦。花雕醉鮑魚，酒味聞起上嚟好香，但入口唔會嗆喉；而飽魚口感爽脆、帶嚼勁。 花菇紅燒鮑魚，食完鮮鮑魚，緊係食埋呢個乾鮑魚，芡汁味夠濃，鮑魚、花菇都夠入味，而且夠腍，輕易嘴嚼。 自助區美食藤椒魚皮魚皮夠爽、夠鮮；藤椒味夠香、夠辣，勁好食！可惜嘅係魚皮切得較幼身，食起上嚟有d唔夠暢快。 炆豬手辣度對於食唔到辣嘅我嚟講絕對係啱啱好，微辣易入口。豬手入味，但又唔會煮得太腍，反而仲有煙韌嚼勁嘅口感。 個人總評係，雖然唔係每樣都好好食，例如燒牛舌，今次就過左火喉，肉質韌到我都咬唔開。不過整體而言，都係值得推介嘅，抵食、選擇多、材料新鮮、烹調入味。點擊圖片放大 +4
