又開始轉涼，朋友提議食羊腩煲，諗起之前食過嘅二鍋頭都有羊腩煲，地點又就腳，而且唔會好似傳統酒樓咁嘈，啱晒我地又要有食物、又要有環境。 同為食朋友食火鍋放題真開心，呢度煲底、火鍋湯底都有好多選擇，最正係煲底都可以任叫任食，有雞煲、豬手煲、牛尾煲，當然仲有為朋友專誠而嚟嘅羊腩煲啦。火焰牛尾煲要左中辣，入口有好香嘅花椒味，牛尾唔會炆到腍晒，仲幾有咬口。點擊圖片放大 之後到主角羊腩煲，第一次食呢度嘅羊腩煲，果然無令我失望，羊腩無羶味，皮層勁爽彈，肉質唔霉，點埋腐乳食，味道甚有層次；就算係配菜嘅馬蹄同枝竹都一樣食得滿足，因為夠入味之餘，又唔會過晒火喉。 食左兩個完全唔同口味嘅煲就緊係要食埋火鍋啦。入座時，侍應推介左每日限量嘅養生滋補鷓鴣鍋，甚懂養生嘅朋友即刻點頭，叫侍應預留。上枱時，朋友即刻心心眼，佢話有好多杞子，個湯一定好好飲。我地跟足侍應指示，大滾後三分鐘，聞到香濃蟲草藥材味就可以𢳂碗湯，試吓個湯頭先。 呢個湯底真心推介，味道十分清甜。配上火鍋烚烚吓，所有食物入口都多了一份香甜味，特別係蔬菜類食物更係錦上添花，豆腐、南瓜、菜芯等都更美味可口。點擊圖片放大 +5 自助區食物望落都十分新鮮，但食完兩個煲、飲完兩碗湯、再加一輪蔬菜放題後，自助區食物只能精挑細選，最終只能夠輕嘗三數件，不過今餐真係口腹都感到大滿足了。下次決定約多d朋友一齊嚟，咁就更加可以食到更多唔同煲底，再食更多自助區嘅食材喇！
