香港幾年前就興起酸菜魚，一試難忘。聽講長沙灣有間餐廳嘅酸菜魚勁抵食，一於搵食到長沙灣！ 一睇餐牌，傳聞果然無錯。平時食大盤酸菜魚，好多都要3百幾，呢度只係2字頭 （大盤酸菜魚$228-$268)，真心抵食。一人套餐(鱸魚片 $76)人就係貪心，睇到門口宣傳，又想食煲仔飯，為左留quota食飯，所以只好揀選一人套餐嘅酸菜魚。不過即使係一人套餐，魚同湯底都一樣有唔同嘅選擇搭配。揀返一向食開嘅鱸魚，魚片大大件、滑捊捊、小小爽彈；最讚係湯底，係好正宗嘅川菜風味。點菜時同落單姐姐傾左兩句，原來師傅做左好多年川菜，唔怪之得做到川菜嘅特色:麻、辣、鮮、香！其中嘅酸辣味，層次感豐富；微酸嘅湯頭同微辣嘅椒味互相平衡，勁正！ 鳳爪排骨煲仔飯($60)除左川菜做得出色，另一港人至愛嘅煲仔飯都係呢度嘅招牌菜。叫左朋友最鍾意嘅鳳爪排骨煲仔飯。飯粒分明、夠乾身；煲仔飯嘅靈魂-飯焦，啱啱做到微微燒焦，帶焦香，但唔苦。不過最正嘅，我覺得係畫龍點睛嘅甜豉油，豉油少少杰身，配上飯粒同食，更添滋味。點擊圖片放大 小食見個酸菜魚做得咁出色，決定叫多幾款小食，滿足吓食川菜嘅慾望。相對比起酸菜魚，小食嘅味道唔算濃郁，聞到微微嘅辣香，但入口完全唔辣，不嗜辣嘅我，絕對係放心食到最後。涼拌海蜇($28)海蜇幾爽彈，有微微麻油香味； 麻辣豬耳($38)極輕微嘅麻辣，易入口，啱晒想試麻辣，但又怕辣到食唔到嘅我。 鹽焗鳳爪($38)驚喜位係鳳爪碎上，怕吮腳趾而失儀就啱晒。不過朋友卻嫌無左食鳳爪嘅風味。 紅糖糍粑($28)最後當然一定要食埋甜品-紅糖糍粑啦！一碟有6條，金黃脆皮，配上軟糯煙韌年糕條，呢個口感真係我至愛。 真心話，呢間平民鬧市中嘅小館，真係做到正宗川味，但價錢親民，我地叫到成枱嘢食都只係三百有找。特別係人少少但又想食酸菜魚，呢度嘅一人餐真係非常適合。不過坐位較少，今晚都要等左陣先有位。
