第一次嚟呢度，已經愛上呢個地方。相信以後絕對會繼續再嚟。因為呢度食物高質，環境舒服。👍👍👍喺朋友介紹下，叫左個派對套餐A1(每位$168/4位起)，包小食、一款頭盤、兩款主食、飲品，份量按人數計。 🥗凱撒沙律頭盤揀左呢個沙律，蔬菜新鮮爽脆；沙律醬十分出色，係正宗凱撒沙律醬，濃郁而帶有獨特嘅鹹香及開胃嘅酸味。仲有毫不吝嗇地灑滿芝士，食入口就更香。 🥟日式餃子面層灑滿木魚碎，上枱時見到不停擺動嘅木魚碎，更添氣氛。而味道亦不俗，有肉汁。 🍗🥠🧅小食併盤呢個好好食😋全盤小食炸得金黃，但全無油膩感覺。小食包括蜜糖雞翼、咖喱角、春卷、麥樂雞、洋蔥圈。除左麥樂雞普通d，其他各樣都非常好，夠香脆；春卷、咖哩角皮薄，餡料香。 主食揀左意大利飯同長通粉，大大碟之餘仲好好味。🍛鮮茄茸鴨胸燴意大利飯茄茸很足料，啖啖蕃茄香；鴨胸切得細細件，吃得方便之餘，伴飯食味更濃，更混有煙肉、蘑菇，令味道變得多元。唯一美中不足係未做到意大利飯獨有果種硬度，少了咬口。 🥘香草忌廉雜菌煙肉長通粉忌廉汁非常香濃，有芝士香，長通粉軟硬適中。亦要讚餐廳選用長通粉，因為長通粉嘅坑紋能沾上更多汁料，令每啖入口都食到非常creamy、濃郁嘅忌廉汁。 🏺最後係飲品，jar上，而且無限添飲，食完香炸小食或者食完繼續留喺度傾計，都可以不停有嘢飲。不過飲品味道就不甚特別，唔係值得大讚嘅好飲。 喜歡呢度，因為餐廳環境濶落，裝修以紅白色為主調，沒太多花巧，有大大個飾品櫃藏有店主珍藏，很有家嘅感覺，所以幾舒服；餐枱擺放可容納不同人數群組，二人雅聚，或大班朋友圍爐暢談亦得；仲有好多broad game可借玩。呢度真係友聚嘅首選好地方。@Nardo's Cafe旺角彌敦道594-596號旺角新城8樓
