適逢少奶待產中，分享一下航空公司係要花幾多錢去服侍咁多位大肚婆。 空中服務員嘅產期基本上可以分為四部份，新孕期，產前假、產假、產後假。 一、新孕期 根據航空公司規定，懷孕13週以上嘅空中服務員必須停飛，所以當精子同卵子結合果一刻開始至到13周呢段新孕期，空中服務員可以選擇繼續飛或者唔飛。少奶記得有一次去悉尼嘅航班，同個standby阿姐傾傾吓計突然知道原來呢個阿姐有咗兩個月，嚇撚死少奶，即刻唔敢比佢做嘢，你知啦飛機通道廚房都好窄，啲嘢又重，架餐車又四圍飛，幾乎所有野都響晒stomach-level，一個唔該好易撞親個肚。阿姐話佢想做埋呢班機先至同公司講，因為佢想去澳洲盡情咁買晒啲BB野，先至唔飛咁話喎。雖然大家萍水相逢，又整鬼成班機得我一個人知，又唔可以話俾其他人知，搞到我好大心理壓力，果班機我都真係博都盡，一個人做晒兩個人嘅嘢。以後唔該各位同事，如果你未夠三個月，保你大千其千其唔好同其他同事分享呢個天大嘅喜訊，否則你身邊嘅人會死好多細胞。 二、產前假 由你知道自己有咗（或者你想公司知道你有咗）到十星期有薪產假嘅呢段時間，你有兩條路揀：轉做有薪地面工作/申請產前無薪假。好多姨媽姑姐都以為我地會去做地勤，但我想同姨媽姑姐講，我哋會做好多國泰城嘅地面工作，就係唔會去做地勤，因為根本冇呢個選擇。你可以想像一下，我哋有一千個地勤，一萬個空中服務員，只要有一成空姐大肚，咁所有地勤幾乎可以失業，又或者所有幫你check-in嘅人都係大肚婆。我自問真係唔可以下下都烏底身幫你個Rimowa貼行李牌貼紙，再企起身叫下一位乘客過黎我櫃檯check-in，仲要大住個肚返24小時on shift嘅工作。 我哋一般係返寫字樓文職嘅工作，當中包括人事部會計部機艙服務部銷售部等工作崗位，對住電腦多過對客，由朝早八點返到下晝五點，或者朝早九點返到下晝六點不等嘅連續九小時工作，當中包括1小時15分鐘嘅午飯時間。呢段時間你每天可以獲得相等於飛行時數4.25小時嘅薪金。如果你需要到健康院接受產前檢查，憑到診證明書便可享有一天病假福利，但不包括任何健康講座，物理治療課程，或任何產前訓練班。 如果你選擇申請產前無薪假，就必須不遲於第13週開始放假，直至法定十星期有薪產假為止，呢段時間你除咗冇嘢做，亦都冇錢收，但就可以同你個baby好好享受呢段雙失假期。 三、產假 根據香港勞工法例，由預產期前連續工作40星期的員工可享有10星期有薪產假。 咁一般嘅懷孕期都有40個禮拜，所以就算你training緊嘅時候已經發現有咗，都可以享有呢個福利架啦。產假分佈我哋公司只有三個選擇提供：前二後八/前三後七/前四後六。如果你一開始係選擇咗無薪假嘅話，咁揀邊個都無所謂啦，但係如果你選擇咗做地面工作嘅話，咁揀前四後六就會輕鬆D啦。呢段日子你嘅產假人工會以每天3.25飛行時數計算，或以過往12個月平均工資的五分之四月薪，價高者為準。 四、產後假 Baby出世之後，空姐媽咪除咗可以繼續享受你之前所揀嘅後八/後七/後六有薪假期之外，仲可以額外申請產後無薪假。產後無薪假由實際出生日起計直至不多於16星期為止，而呢段額外嘅假期亦都隸屬於雙失行列。 五、旅遊 如果媽咪選擇咗攞無薪假嘅話，雖然仍然可以享有員工機票優惠，但係由無薪假第九十天開始需要以信用卡預付形式購買機票，如果最終因為任何理由而downgrade/no show嘅話，就要再同公司做翻個refund手續。 六、醫療 無薪假期期間僱員和僱主的強積金供款會暫時停止，但仍然可以享用一般醫療保障。 七、不幸流產 懷孕不足28週前流產會即時獲得病假批准，而懷孕28週以上後流產可繼續享有十星期有薪產假。 八、I CAN FLY 根據民航處規定空姐重返崗位前必須獲得medical clearance醫療證明，確保該員工有足夠能力繼續擔任飛行工作。公司會首先安排媽咪完成飛行安全訓練課程後才編配flying duty，並且會安排自己在第一班機為額外人手，觀察其他同事的工作情況，而通常你都會發現呢十個月公司所有service都已經變哂，直到飛第二班機你就可以正式投入服務。 九、檢查文件 正式返工之前記得檢查一下你嘅護照、回鄉證、工作簽證嘅過期日，及時申請新文件，仲有唔好唔記得將你Baby嘅出世紙交返去公司，幫佢申請醫療福利同旅遊福利，咁以後就可以安心同你嘅Baby繼續Happy flying啦^_^！
