住係香港既朋友都一定知道最近國泰工潮事件，就算你已經唔買報紙你都會嚮網上新聞睇到，就算你唔睇新聞都會嚮facebook見到，拿！就算你宅到唔上網我諗你都會嚮朋友既口中聽到，如果你到宜家都唔知國泰有工潮，你... 真係聽都無聽過？唔係掛？ 事件將近一個月，話說4月28日330名工會成員向資方表示不滿，同月30日工會收到資方回覆，表示願意為此作詳細討論，並定於5月8日進行會面。 一、資方違反業界協議及內部守則，更改墨爾本酒店的外站津貼收費。 「即係咁既，根據條文規定，空姐平時既外站津貼係根據當地既物價指引以及該酒店提供既早午晚三餐價錢所釐定。至於早午晚三餐究竟係咩價錢呢，你只要行入去間酒店，去佢個餐廳，打開個餐牌，見到早餐邊個有蛋有腸有咖啡飲，咁就攞返個中位數，咁呢個價錢就會係早餐津貼喇；如是者午晚餐你又打開個餐牌見到有雞有飯有湯有沙律之類就攞返個中位數變成呢間酒店既午晚餐津貼。至於你響呢間酒店究竟可以得到幾多津貼呢？就視乎你會經歷幾多個日出、晏晝、同夜晚啦。有時候例如我地去菲律賓過夜，好景不常><"你夜晚12點先到，咁就sorry ，你係冇晚餐津貼，然後你朝早六點要走， sorry ，你連早餐津貼都冇，咁你呢一晚就自己食手指啦。咁最近公司就響墨爾本出現咗一個情況，明明我會見到朝早同夜晚，咁公司就會比早午晚餐我啦，不過墨爾本呢間酒店係冇正式餐廳 ，佢得間咖啡室，公司竟然用咖啡室既餐牌成為早午晚餐津貼指引。下？咖啡室好似冇飯食架喎？唔通你認為個包可以成為一個正餐？咁公司又好出奇地同酒店合作推出左國泰員工餐牌，拿，有餐牌俾你架，上面個價錢仲好優惠添，我地就用呢個餐牌價錢釐定外站津貼啦。當地人響酒店食個飯閒閒地都要＄30澳幣架播，你自己寫個＄10餐牌？下？咁你即係你鍾意比幾多就同酒店講幾多？都唔係根據當地物價既？」如果條例通過，全球100間外站酒店有可能陸續出現國泰職員指定餐牌。 二、2012年4月起所簽訂的長期合約出現同工不同酬狀況 「由入職講起啦，你要先通過三個月試用期，然後表現好就會加你人工簽張短期合約直到三年，表現好再加你人工簽張長期合約直到升職。基本上呢間公司所有人都經歷過呢三個階段，只要大家都係三個月試用期內，大家時薪都會一樣$A。只要大家都做多過三個月但未做夠三年，大家時薪都會一樣$B。只要大家都仲未升職，仲要著住紅衫紅裙去派餐既話，大家時薪都會一樣$C，出現左呢三個階段性時薪改變。最近，奇怪既事情出現了，話說2012年四月入職既妹妹，即將做滿三年要升做長期合約，呢班妹妹突然發現點解我同做左四年個姐姐係唔同時薪？而佢既新時薪係介乎$B同$C之間，就引發所謂紅裙長約出現同工不同酬既情況。」暫時受影響員工為2012年4月以後入職的空中服務員，咁2012年4月之前入職既空姐係唔係就可以坐定粒六，置身事外？但點解今次出黎抗議好似唔單只係妹妹喎？就要睇下遲D紅裙升黑裙$D、黑裙升金衫$E、金衫升黑衫$F會唔會同樣出現同工不同酬既情況喇。 三、刪除定明於機艙服務員工作守則（安全及緊急手冊）內對於不合作不守規矩的乘客的處理手法和對機艙服務員的法律保障。 「公司對不合作乘客有四個程度分類，恕我唔能夠直言，因為呢四個分類同相應既處理守則會關係到航空安全，自911發生後有嚴格保密協議，唔能夠隨便向公眾透露。簡單來講，你可以理解為機艙服務員為航空公司辦事，工作時間內發生意外有機會不被公司所保障。最近公司單方面修改有關條例，刪除個別保障字眼。工會質詢時資方解釋：唔係！其實同以前無分別，大家唔使擔心，有D字眼寫得唔係咁清楚，所以公司就刪除左D唔清楚既字眼。工會反駁：你刪走果句，又唔見你加返D清楚既字眼？咁都仲同以前一樣？」 呢三宗罪就係今次工潮主人翁，少奶有部份地方同意，但又有部份地方唔係咁認同工會既立場。唉呀。。。
