環球影城朝早九點開到夜晚八點，出名多野玩， 2015年仲加推哈利波特同Universal Cool Japan四合一《進擊的巨人、生化危機逃脫、Evangelion，Monster Hunter》，點先可以係最短時間玩齊樂園活動可以參考少奶攻略。 一、上網買定飛 環球影城現場買飛都要排一個鐘，去過日本嘅朋友都知道，日本好hihi，為左保障國民利益，好多時上網買嘢只提供日文版，如果你要睇中文或者英文嘅話呢就係要比貴啲又或者根本冇得比你睇。日本環球影城都係一樣，你想上網買飛呢就一定要用日文版，好快咁講一次，你明就明。 首先出入去呢個網址 http://www.usj.co.jp，左上角見到NEWチケット，右邊揀你想去嘅日子，出返嚟下底會有門票選擇，由上至下分別係標準門票、殘疾門票、三點後入場嘅半日票、兩日票、樂園visa門票、會員票、年票，通常我哋香港人都係去一次就揀第一個嘅標準門票，之後要選擇提取門票方法，分別係用QR e-ticket，或者直接去入場櫃檯換領一張黑Copy嘅門票（都係要排隊），如果你有Smart phone咁梗係揀ダイレクトインQR e-ticket啦。之後你就會去到下一版追加Express Pass，頭兩個黑色Express Pass5同黑色Express4係為哈利波特同Cool Japan而設嘅Express Pass，不過我見好多五月底之前都已經賣晒，你不妨試吓運氣。下面嘅白色Express7/5/3係針對非哈利波特同Cool Japan以外的普通樂園遊戲而設嘅，例如係大白鯊，蜘蛛俠，侏羅紀公園等，例如你買咗白色3，就可以係樂園來任選三個遊戲Express通道。揀之後禁最底個掣新規會員登錄して購入手續きへ進む，輸入個人資料，呢度佢有例子俾你所以我唔講啦，祝你購物愉快。 二、入場整理券 就算你成功入場，有四個遊戲你必須提前攞咗指定時間入場整理券先至可以玩。分別係進擊的巨人、生化危機密室逃脫、哈利波特和侏羅紀。留意番地圖呢四個遊戲嘅入場整理券會響29,20,62同48附近。攞齊四張入場整理券之後你就可以放心去玩其他遊戲，到你指定Time Slot時就返黎呢四個地方玩。 三、心儀對象排優先次序 你要有心理準備一日係冇可能玩得晒，咁呢個時候就盡可能玩啲較為值得去玩嘅嘢啦。 I. 進擊的巨人｛朝聖指數：5｝ 睇過進擊的巨人嘅你，入到去其實係再睇一次電影，同埋人物同道具影相，成個館其實係無新意無驚喜嘥時間，但身為Die Heart Fans ，點都要去朝聖一次先可以話俾人聽我真係去過。 II. 生化危機密室逃脫｛驚嚇指數：5｝ 入到去會有班怪物不停追住你，身邊滿佈尖叫聲、喊聲、或者根本係噎到失聲，如閣下患有高血壓、心臟病、膽固醇、失禁、失聲、失戀都唔建議入場。如果你呢個係一個追女trip嘅話，玩完密室逃脫之後我相信個女仔一定會拖實你唔捨得放手。 III. 霍格華茲城堡之旅｛刺激指數：5｝ 想同哈利波特一齊坐係掃把上面飛越霍格華茲，呢個遊戲你一定唔可以錯過。呢個城堡本身已經係一個藝術品，再坐係吊車上面穿越一個又一個嘅經典場面，記得唔好着拖鞋呀，否則識飛嘅妙麗都幫唔到你執返隻鞋。必玩！ IV. 哈利波狗過山車｛刺激指數：4｝ 如果你冇膽玩最刺激嘅荷里活夢幻列車，咁呢個哈利波狗過山車就好適合你啦，冇咁驚得黎又夠刺激，最重要係呢個係限量版遊戲。 V. 鄧不利多魔法棒教室｛童心指數：4｝ 有個識得講日文同英文嘅鬼老扮鄧不利多校長，佢會當場選一個細路做佢嘅學生，教佢用魔法棒，揮一揮啲櫃桶就識得彈出嚟，揮一揮天花燈會閃下閃下，再同在場人士sell下個支爛鬼魔法棒。如果你唔係細路，又或者根本唔係佢揀個個細路，成件事其實會好無聊。 VI. 大白鯊Jaws｛濕身指數：5｝ 坐係一架七排座位每排五個人嘅船上面，由船長帶領之下泛舟目擊大白鯊嘅驚險旅程。如果你係坐係中間嘅話，恭喜你可以好安逸咁樣欣賞呢個大白鯊食人之旅，但係如果你係坐係最左最右最前最後嘅話，你係會由頭濕到落腳指尾。 VII. 侏羅紀列車Jurassic｛刺激指數：5｝ 根據典型電影劇情發展，你首先會見到草食性嘅長頸龍同雷龍，「哇好大呀」，跟住會見到走得好快嘅速龍同三角龍，「哇好得意呀」，之後會見到飛龍同即將要食咗你落肚嘅暴龍，就嚮你想講「哇救命呀」之制就會從26米高嘅山頂直衝落谷底，必玩 VIII. 水世界劇場WaterWorld｛合家歡指數：5｝ 入口處有螢幕顯示今日劇場時間，好似去海洋公園睇海豚表演一樣。不過今次就係特技員騎着水上電單車開車英雄救美，間唔中有啲爆破同放火嘅場面，適合擁有暴力傾向同過度活躍嘅男孩子觀賞。 IX. 幕後製作Backdraft｛合家歡指數：4｝ 想知道環球影城片場嘅幕後製作？呢度每一個客人都係導演編劇同演員。你可以喺度欣賞震撼嘅撞車特技，驚嚇嘅冧樓場面，危險嘅爆破環節，雷電交加風雨災難都一一呈現係你面前。 X. 回到未來列車｛頭暈指數：5｝ 你會同八個陌生人一齊左係一部唔識移動，淨係識得震同搖嘅列車上面望住一個3D嘅螢幕，見到螢幕上嘅人同物件飛下跳下，完全係一個呃錢遊戲。如果你食飽左野先玩，一定會搖到你嘔晒出嚟。 XI. Evangelion超動感影院｛頭暈指數：3｝ 以新世紀福音戰士為背景嘅4D超動感影院，亦都係Universal Cool Japan嘅節目之一，如果今次唔睇，過咗5月10日就再冇機會架啦。 XII. 蜘蛛俠列車Spiderman｛頭暈指數：4｝ 今次係坐係架識得郁嘅列車上面遇到壞人同障礙物，前無去路後有追兵，不過唔使怕，因為蜘蛛俠會幫你將壞人逐一擊退。 XIII. 荷里活夢幻列車Hollywood Dream Ride｛壓力指數：5**｝ 驚險旅程運行全身，荷里活夢幻列車帶你飛越天空，一個又一個嘅尖叫聲此起彼落。 四、園內消費 入得黎呢啲景點玩，就要預咗加錢額外消費，想買得有價值，就要留意以下嘅少奶貼士： A. 進擊調查兵團斗篷 調查兵團代表勇氣和自由，絕對適合今日戰斗格嘅你。穿上一件綠色連帽斗篷，打風落雨都唔怕濕身。 B. 兵團遠征餐 ¥850-1100 分為士兵餐和隊長餐，士兵餐有蘑菇湯、薯仔同麵包；隊長餐有蘑菇湯、薯仔、煙肉同特製紅茶口味麵包，食飽飽先有力氣作戰，唔好令Mikasa擔心。 C. 奶油啤ButterBeer ¥1100 霍格華茲魔法學院最出名嘅魔法飲料Butterbeer，連英國都冇，全球只在日本大阪獨家發售。此乃非酒精飲料，有奶油、牛油，拖肥糖漿、麥芽、玉桂加神秘香料及魔法咒語混合而成，萬勿錯過。 D. 哈利波特南瓜汁¥800 魔法學院的獨有南瓜汁你一定聽過吧，但千萬不要和人類的南瓜湯/蔬菜汁扯上任何關係，它的味道就是讓人想吐，難怪人類總是和魔法學院對著幹！ E. 大白鯊套餐¥1450 進階版肯德基，套餐包括汽水、幾年湯、炸雞及薯條，加¥350仲可以換購大白鯊隔熱手套一隻。 F. 侏羅紀排骨¥1540 食到好味又多汁嘅排骨之餘，再送你一隻侏羅紀恐龍隔熱手套。 G. Minion爆谷 大阪關西機場一定會見到好多大人細路條頸都掛住一隻好Cute好靚嘅黃色小小兵Minion公仔，大人細路都鍾意。 H. 芝麻街氫氣球爆谷¥1490 五、壓軸活動花車巡遊 每晚完結前都一定會有花車巡遊，就好似每年國泰尖沙咀嘅花車巡遊一樣。如果你都想用盡最後一刻回味今日嘅環球影城，就記得霸定個靚位等睇好戲。但係如果你一啲興趣都冇嘅話，就記住及早離場，因為花車一旦開始，就會四處封路，都時你想走都冇得走啦。 最後順帶一提，七點過後哈利波特園區係唔使禁飛都可以入場的。如果你仲有時間，咪鬼理果個花車巡遊，一定一定要在入夜後再去多一次霍格華茲城堡，一來係無人唔使排隊，少奶即刻可以玩多次飛天掃把同哈利波狗，加上昏暗燈光同渺無人煙，成個魔法學校靚到好似鬼屋一樣，但假若你一不小心誤闖禁地，千祈唔好同佛地魔講呢個係少奶既主意... 祝閣下旅途愉快！ 【※FACEBOOK:少奶的空姐黑盒 click to Like Page ※】 去片→HD 愛玩客 日本環球影城 哈利波特魔法世界當麻瓜 https://youtu.be/glCpY_Iwg9o
