公司兩大要則： "Service straight from the heart" "Never say no to our passengers" 有時候要滿足乘客需要，但又要維護公司守則，唔答你又冇禮貌，當面拒絕你又怕你難堪，空姐好多時都係明知不可為而為之。公司有好多潛規則，希望各位貴賓可以多多包涵。 1. Upgraded 我哋係無免費upgrade嘅，起碼我做咗咁多年都冇親眼做過，亦都冇聽過啲做咗更加多年嘅同事講過佢見過，無論個客係新婚、生日、周年紀念、你屋企有人生咗仔或者過咗身、就算你係特首都好，我哋機上面係唔做即場免費upgrade嘅。無論你之前聽過邊個姨媽姑姐講過佢都係咁，或者第二間航空公司都係咁，或者報紙寫過都係咁：絕無其事。 2. Member 綠銀金鑽會員永遠都係我地最重視嘅客戶群，你銀行戶口數字代表左你嘅身份，同時亦代表左你嘅修養。千祈唔好同普通人一般見識，貪便宜，攞着數，希望你明白，芝士同香檳係比商務艙嘅客人享用，不過東方同蘋果冇晒真係冇晒，呢度唔係InterContinental ，我冇辦法叫個BellBoy去隔離七仔即刻幫你買，亦都唔會專登收埋唔俾你等你來鬧我。試想下，一個太空人想食橙，佢點樣可以嚮太空艙突然種個橙出黎呢？銀行戶口有咁大銀碼嘅你，請好好利用地面資源。 3.嬰兒安全帶 嬰兒安全帶係比零至兩歲嘅嬰兒使用，但似乎大家對於兩歲都有唔同嘅睇法，我係度好明確咁講一次，兩歲即係由醫院生出來嗰日開始計起嘅24個月，新制度下24-36個月幼兒家長則可自行判斷使用嬰兒安全帶。但無論新舊制度，對於足36個月的幼兒，均無法獲豁免。所以無論你嘅公子或公主係幾得意、幾可憐、幾唔願意、以前試過、第二間航空公司試過、聽人講過：恕難從命。 4.加長安全帶 機上提供加長安全帶將原有安全帶嘅長度增加，滿足部份體型壯健乘客嘅需要。但航空公司會限制這類乘客使用緊急出口座位或加寬前腳座位，呢個係民航處同航空公司既共同決定，卻要由空姐來執行。如果你見到個空姐過黎要求你調位，又面有難色唔知應該點同你講解調位既原因的話，希望你不要問，只要做。 5.地氈 飛機嘅地氈有別於閣下屋企嘅地氈，腳下屋企嘅地氈最多只會四五個人踩，而且你傭人時不時會起出黎清潔吸塵，但係飛機嘅地氈比千千萬萬嘅貴賓踩過，仲夾雜少量橙汁同嘔吐物，除非閣下好western，千祈唔好比自己或閣下既小寶貝赤腳在機艙內行走。
