事項一、體諒空姐珍貴的休息時間 請你明白空姐的工作時間不定時不定量不定時區,飛一個長途機講緊係半夜嘅15個鐘,我都好想可以同你facetime一個鐘,但往往現實我只能盡最大精力whatsapp你三個字。你唔好以為嗱我今朝8點做到今晚零晨1點,比我休息兩日第三日朝早8點再做到零晨1點,容咩易啫(高音)~ 錯!WRONG LOGIC!你應該試下日頭嚮屋企有人嘅時候訓覺,你細佬彈結他,你隻狗對住個窗吠,你阿媽摺完衫入黎幫你放入衣櫃,呢個時候你老豆竟然仲可以一個翻身攝入黎大噎佢部電話上唔到網。你以呢個半睡半醒嘅狀態到晚上8pm起身,抬住舊石用兩個鐘頭坐車去返工嘅地方,而好大可能你屋企無直車可以返到呢間公司,咁就要勞煩閣下抬一抬呢舊石轉車繼續前往指定目的地。10pm返到公司settle down,就可以準備10:30pm同今晚當值同事一齊黎個1.5小時嘅席前會議,到零晨12點,你終於可以正式開工!無錯,攪咗一大輪,其實你喺岩岩先duty start,恭喜你,你可以從凌晨12點開始慢慢享受呢15小時既奇幻旅程。 不過真係咁嘅話鐵人都唔掂啦,其實你係有三個零鐘rest嘅,公司安排咗張兒童床比你,咁唔係真係very小童嘅,大概teens咁上下啦,你睇個個同事都咁瘦就知啦,肥D都唔會請。呢三個零鐘都已經包埋閣下用膳嘅時間,不過要麻一麻煩你企喺度食,而且食嘅時候你D客可能未必知你rest緊,依然會keep住send email入黎,而大部份時間佢地鍾意walk-in上你office,甚至乎會打電話上黎叫你落街比份文件佢。無野嘅,你當見客就得架喇。當你再返去你office個位見到呢個凍咗嘅飯盒,又好似無咩胃口,飲杯果汁當食咗飯算喇。都ok嘅,用呢個身型去訓覺其實會幾fit張兒童床,咁你就知道點解新聞影住著制服嗰D可以瘦過招聘日嗰D咁多。 好不容易終於開工開到第二日3pm,你執好哂野鎖哂門行樓梯落管理處簽到簿排隊辦埋離場手續,再去寄存部攞返你琴晚擺低嗰舊石,等埋全公司所有同事人齊大概4pm可以上旅遊巴,坐個零鐘頭車終於到達麥理浩夫人渡假村。到你check-in入到房放低行李時已經6pm,你用最後一口氣whatsapp你honey一句「I love you」,打算以冬眠嘅狀態結束呢場奇幻旅程時發現,X你,天光!唔記得麥理浩夫人渡假村同我屋企原來有時差,出面又開始鬼殺咁嘈! 事項二、雙方高度信任 希望你明白因為工作需要,空姐係會化妝/同陌生人講野/成日笑/唔可以24小時開電話/唔係成日都有wifi同你facetime/到佢得閒時你可能已經訓咗/會識得機師朋友的。切記唔好自我重組句子以為你女朋友『出街化行哂妝咁笑住同陌生男人講野又成日唔開電話扮無網絡搵你唔到我唔訓覺都唔打比我仲唔認自己溝機師!』 一段健康嘅感情需要互相信任,尤其是同空姐拍拖,好多時你真係未必知道佢做緊咩,唔知佢standby飛咗去邊,delay到幾時先返,又或者班機唔知咩原因divert咗,明明同你講飛Sydney最後land咗新加坡。我知你好想嚮部電話嘅find friends度見到佢喺邊就正如我直頭好想嚮你個頭殼頂上面裝部cam一樣,但現實往往事與願違。 的確,呢個職業嘅性質,好可以易如反掌地將一段外遇關係隱藏得天衣無縫,空姐身邊出現太多靚仔,有錢仔,明星,莫講機師,律師會計師同醫生都出哂黎,如果佢要有外遇,你未發現之前佢都一早已經飛咗你啦,仲等你有時間懷疑咩?但嚮茫茫人海之中,佢選擇咗你,你選擇咗佢,兩個人走埋一齊呢個係緣份,唔好成日互相猜忌,見到你唔開心時佢又唔開心,嚮酒店房對住四幅牆喊到流哂眼淚咁,打電話返香港又貴,viber 啲 好朋友又訓哂,連開部電視都成口雞腸咁,睇唔開真係好容易鑽牛角尖出事。奉勸各位大佬一句,請高抬貴手,有事香港解決,outport不宜出火。 【※FACEBOOK:少奶的空姐黑盒 click to Like Page ※】