上網見好多網誌力推嘉道理農場出哂啲櫻花,仲話二月尾就會開始無,見宜家太得閒係屋企䟴䟴腳,同友人搵岩時間,即刻上山參見櫻花真貌! 事前講聲,嘉道理農場,聽個名都覺得好有童真,入面有櫻花睇之餘,仲種左好多不同品種既植物。重點係佢仲有養動物,雀仔個啲,成件事真係好似去翻小學旅行,完全諗翻起無知小孩第一次出城個種振奮人心既感覺。 咁話明又養動物,又種野,自然需要小小經費打理,所以入場費用收$30大元,唔適合正係節衣縮食,月尾唔夠錢既朋友去。不過收錢有收錢好,入面設施好,有水斟,有車坐(要額外俾錢),有野睇,條路舖到著高踭鞋都唔會跌倒,所以當日沿途係見到勁多男朋友帶埋女朋友過黎拍拖,可以懶係大自然又唔會搞到對方躁底。 係山腳附近上兩分鐘路,就已經可以睇到動物仔。 不過呢樣唔係主打,所以都係走馬看花。 倦極入睡既鹿鹿 肥到攤係到郁都郁唔到既野豬 山下溫室旁既小花 點擊圖片放大 溫室仙人掌 其實入面有啲係差唔多成個人咁高,不過影出黎唔係好靚,所以無影到。 港式梯田! 其實沿路上山,本身係會有馬騮睇,但係我去個陣佢地要閉關,所以無緣say 個HI! 睇完下面既植物,就開始一路上山。既然一場黎到,當然我地係唔會搭車,選擇行上去,其實邊行邊傾偈,個零鐘就會到頂。 行完呢條路,因為蝴蝶俓封左,所以只係可以行大車路,雖然無咁斜,但係真心長好多! 認住呢舊野,當你以為好輕鬆,全程影下相,係旁邊張櫈坐下既時候,下一步就係要面臨到頂個條斜路,絕對要俾少少心理準備係有啲難頂。 沿途行上去,都會見到數棵櫻花,不過我地上到去再影。行行行,行到就黎頂唔順,就會又有櫻花,梅花鼓勵你再行。 點擊圖片放大 +2 花花花花,睇完之後就差唔多落山,一直落斜,轆到落底。 題外話: 嘉道理農場開9:30 am , 收5:00pm, 年三十至年初四閉園。 要去既就到大埔墟或者太和火車站搭64K就去到,車程大約20-20分鐘。 成個遊園時間大概4-5個鐘,所以唔好兩三點先黎,會上唔切頂又睇唔哂啲花。