趁住假日得閒，自己一個女仔留係屋企，時間係過得出奇地慢。 與其哂左一日時間搞到自己揼心口，不如搵個頹山行下。 今次行既深水埗嘉頓山就係完全適合一啲時間唔多，體力差，追求快靚正，又想貪心行山既各位！ 係深水埗地鐵站出發，行到美荷樓青年宿舍，隔離就係鼎鼎大名既嘉頓山，成個過程由市區到入深山，不過係20分鐘。 呢個山之所以係人都行得，係因為啲路係全程石屎路，大約只係500幾級樓梯到。就算你行到幾慢都好，都包你20分鐘之內上頂。 上到頂，有幾隻大狗狗。行開呢個山做運動既人好似同啲狗狗好熟咁，同啲狗狗改哂名，不過我撞聾聽唔清啲狗狗個朵。 係個山頂，可以望到深水埗一帶街景。不過日光日白去，無街燈無盛，係失色少少。不過呢張相右下角就影到嘉頓廠房，其實呢個山之所以叫嘉頓山，咪就係因為夠近嘉頓。 山頂另外一面係望石硤尾,個景係數唔盡既公屋同地盤。 貪得意加左effect，影落去啲樓同地盤真係好似LEGO咁。 嗱！無呃你，落山個時見到個啊伯，真係連啊伯都行到，所以只要你有腳就上到黎！ 呢棟就係美荷樓青年宿舍，入面仲有間CAFE同生活館可以順道行下坐下，當係獎勵下自己咁辛苦行左個嘉頓山。 秒速行山之全程都係輕鬆用左一個鐘， 落到去仲有大把時間周圍行周圍食。以後真係無藉口話自己無力無時間行山。
