今次想同大家介紹既係一個英國沿海小鎮 －Whitby（惠特比），位於North Yorkshire。 個時我就由倫敦去左York度玩，睇下人地遊記有咩推介，結果發現左呢個小鎮，就即刻上網訂火車飛出發啦！ 當日我由York上火車中間要係Middesbrough轉一次車，全程大約2個半鐘頭，人流唔多。 終於到達啦，我想像中應該係一個好細既鎮，仲擔心緊點樣行成日既時候⋯⋯ 一落火車就係呢個碼頭旁邊，呢度真係英國？！？！ 其實呢度係一條漁村，碼頭上既都係捕魚既籠 黎到漁村，緊係要食Fish & Chips啦！我地隨便係碼頭附近入左一間食，味道不錯，而且價錢仲好平，只售5.4鎊！對比倫敦既物價的確係非常抵食！ 塊魚柳都係大過塊面嫁，不過油左小小 之後就向呢度既地標進發 － Whitby Abbey ！ 要上去都唔易嫁，首先要行著名既199 steps，顧名思義，即係要行199級樓梯上去，圖中好多人行個度就係啦！！ 一上到會先見到 St Mary's Church 後面就係Whitby Abbey！(成人 6.6鎊，學生5.9鎊) 從前呢度係一個修道院，但經過戰爭同多年既破壞，就剩底呢d遺跡 不過呢d石柱都別有一番風味！ 行完就過橋去whitby既另一邊啦！ 其實Whitby係由條橋分開兩邊，一邊就係Whitby Abbey個邊，另一邊就係火車站、海灘等等，後者會邊比較多舖頭同野食。 以前呢度仲有捕鯨，所以有個鯨魚骨係度，都係呢一個地標！ 海邊小海又點少得海鷗呢，坐係海邊吹下海風都好爽！ 唔知點解，除左遊客外，街上好多都係老人家！ 呢度亦係著名小說人物吸血鬼德古拉伯爵既誕生地，除左有佢既舖頭之外，每年4月同10或11月都會舉辦歌德節，聽講會有唔少人以歌德打扮參加呢個節日，好神秘既感覺呀！ 呢度除左有紀念品買，仲有Dracula Experience玩，我無入去，不過應該係鬼屋黎 由鯨骨個度繼續向前行，就會去到海灘，有水上活動玩，不過唔算多人，反而岸邊既一排彩色屋企就好吸引我啦！仲有好多上年紀既人坐係度吹海風，好爽呀！！！ 呢d屋企入面真係可以訓嫁，有d打開門都見到有床有檯有櫈 臨走既時候落大雨，呢度另一個好搞笑既地方就係海邊有幾間機舖，結果為左避雨我地就入左去hea陣啦！ 2 pence推銀！最後推到Hello Kitty珍寶珠一粒哈哈 Whitby呢個地方應該係我呢次旅行最大驚喜既地方，風景靚，而且英國大城市都係內陸，好少會去呢d沿海城市，絕對值得推介！！！！
