離開香港五個月，終於回來了。南美的故事，會在這裡慢慢說。現在，就說一個四歲小孩在香港的故事，他的媽媽任性離開了五個月之後的故事。 昨晚下機，隔著欄杆，葉一看見我，呆了一秒，我摸他面一下，就跑出去，那時他才反應過來大叫「媽咪！」，之後就一直拖住或抱著，最特別是，他不停講嘢... 連今晚吃飯的餐廳侍應，收錢時都話，「你個仔好多嘢講呀，好呀，細路口開先好」。「口開」這詞我第一次聽，唔知係咪廣東潮語。 他的問題和多話，令我同時招架不住又改善表達能力（甚至知識）。 例如，今晚我們一路在雨中撐傘，他問我，為什麼會行雷閃電，我想一想，不知怎樣答好，我唯有說，雲好多的時候，除了變成雨，還會變成閃電（光），然後再變成雷（聲音）；光跑得快，你會先見到他，聲音跑得慢，你會最後才聽到。 回家等阿一瞓著之後，我就查了Google，覺得我的回答實在不好，應該多告訴他什麼時候和怎樣形成（空氣中的水份的電正反兩極互相磨擦產生光和聲音）。 又例如，他臨睡時問我，為什麼不能斬樹（這是他無端端問的，沒有前言）。我說因為樹被斬下就會死掉，會傷心；我未說到樹在生時的好處，他已經懂得問我，「咁樹喺度唔死係做咩？」（好叻，識用第二個角度諗嘢），我就告訴他樹是好多動物昆蟲的屋企，例如小松鼠，同埋樹木係製造空氣比我地呼吸，佢就問「咩係空氣」，我就叫佢吸氣，「雖然你見唔到空氣，但你已經吸咗空氣入身體；無哂樹木，我地就呌唔倒氣，所有動物都會死哂」。 可能因為空氣呼吸呢啲太深，佢最後同我總結：咁即係樹木會做好多好靚的屋企，我地唔可以斬佢。 呢個討論都提我，要再簡化（但要正確重點）給他的答案。 另外，葉一金句（包括甜言蜜語和喜劇句子）實在好多： 1. 我今日下午瞓過頭，七點三先起身，學校六點打電話比葉家傑（葉一爸爸），葉家傑揾我唔倒就叫咗我爸去接；我爸打電話比我又敲門都嘈我唔醒（真係火燭實燒死）... 見返葉一時佢完全無嘢，我好內疚攬住佢講「對唔住」，佢話「唔緊要」，我問佢有無嬲，佢話「我無嬲，我掛住你啫」 2. 關於「攬住」，佢琴晚話要同我瞓，「我地攬住一齊瞓到聽日醒吖」 3. 又關於「攬住」，今晚食飯時佢話，「唔好掛住攬啦，食咗飯先啦」 4. 我真係好論盡，今晚我叫咗「XO醬炒烏冬」，點知XO醬有少少辣，我就再叫西炒飯同凍檸水，阿一飲咗大半之後，就指著冰話：「好似海上面的山呀」；很不錯的想像力 5. 呢幾日佢問咗我幾次，點解我返嚟嘅，我每次都答「因為我好掛住你」，佢每次都應我：「我都好掛住你，你返嚟我好開心呀」 6. 今晚一齊沖涼，我除衫時，佢望住我然後放隻手响我條腰，話：「嘩，你身體好靚呀」 7. 今晚佢強迫症發作，唔比我買牛奶話係BB先飲，我諗諗下轉飲豆漿都好；買咗豆漿佢發脾氣話豆漿都係BB先飲，將兩包豆漿放返入7-11！我話係爸爸媽媽想飲，佢話我地唔係BB都唔飲得！我坐咗喺度無出聲，望住佢，隔一陣佢自己返入去7-11，攞返盒豆漿，講「對唔住」 8. 之後佢要買扭蛋，我話佢屋企好多玩具，浪費，呢招以前work，佢宜家話：「啲閃咭唔係玩具喎」 其實只係兩日，佢的性格已經出哂嚟。一本「口開」的書，好易睇哂。
