之前同大家分享左我清潔同用爽膚水既心得，當搽完爽膚水後，基本上已為肌膚打好底，準備吸收黎緊會搽既護膚品，而爽膚水既下一步就係「精華」。「精華」之所以叫精華，因為佢比其他類型既護膚品含有較高濃度既護膚成分，為肌膚密集提供所需營養，可以單用，亦可以幾款一齊用，質感上一般會較爽膚水濃縮。市面上有好多唔同款式功能既精華，有補濕、抗衰老、抗氧、美白、抗皺、消炎、鎮靜等等，價錢由幾十到幾千都有，咁應該點揀？用幾多款？係咪搽得愈多愈好？使用次序應該係點？今次等我同大家分享下我用精華既心得啦！ 身邊有朋友會同時用幾款唔同功能既精華，但我作為懶人，實在冇呢個耐性心機搽N款精華，所以我每次只會用1款精華，我多數都會揀D多功能既精華，夠晒方便，唔洗搽咁多野上面，一次過做晒我想要既野XD我皮膚係混合性，偏敏感肌，容易因為季節轉變或者外界環境既污染物令到皮膚痕癢、發紅、乾燥、保護屏障失靈等等，所以我揀精華都比較著重於補濕同舒緩，而且一定要低敏。我近呢幾年都Keep住用PARS EPIGENE緊緻嫩膚修復美容液，雖然有時都會試下其他新野，但最後我都會用返佢，佢對我咁大吸引力，皆因佢基本上滿足晒我想要既野。 想當年都係機遇巧合下見到有呢枝野，係日本有極高銷售量，佢係一枝抗衰老精華，其功能多多，除左我最想要既補濕外，仲有抗氧、抗皺、皮膚細胞再生功能，成分加入左荔枝提取物、褐藻精華、EP細胞再生複合物同海洋胎盤素精華等等，有助提亮、緊緻、嫩滑肌膚，完全冇刺激感，而且1枝有60ml咁多，可以用2個月左右。 唔好以為抗衰老精華只適合年紀成熟既人，好似我咁，塊面同眼都冇皺紋，25歲後就已經開始用呢類型護膚品，因預防勝於治療，打好個底，有助推遲肌膚老化！PARS呢款精華除左可以幫助已有皺紋或偏熟齡肌既皮膚去皺緊緻外，亦適合好似我呢D想預防既人用。 佢既質地唔似一般抗皺產品咁「結」身，係比較稀，偏水質，一開始用既時候見佢咁水好似流流地，一度以為佢冇料到XD佢搽上面後，因分子低，偏水質，好容易俾肌膚吸收，每次用既份量唔需要太多，我自己就額頭滴兩滴，兩邊面頰各滴3滴，即係每次只需8滴已足夠我成塊面用，雖然質地水水地，但吸完塊面係真係Feel到補濕左水潤左，唔會話吸完好快乾。我用左1個月後，塊面係冇甘易乾到出油，白淨左，冇咁暗黃，又緊緻左。因我以前成面暗瘡，後來護理不當形成凹凸洞，但由幾年前開始用PARS美容液，到依家D凹凸洞唔經唔覺已好左好多，可能幫我修復左D受損既細胞，塊面漲返緊緻左，所以D凹凸洞冇咁明顯！以前試過轉季時，塊面乾到甩晒皮，又痕又紅，最慘係搽乜都好似唔吸收咁，好快又乾，搽太潤又漿住塊面唔舒服，我淨係搽佢加physiogel先冇事，好快就好返回復正常，所以我係極極極愛佢，基本上1年365日我都係用佢，秋冬有時太乾我會配合埋PARS既修復水一齊用，更加補濕，下次再同大家分享佢既修復水😊最後我都同大家分享下用精華既小TIPS：除左我呢D懶人淨係用死1隻精華外，仲有D勤力寶寶會同時用2-3款精華，咁係咪愈多愈好？其實唔一定既，最緊要揀岩自己需要而皮膚又接受到就得，同埋使用既Timing同次序都好重要架！搽完爽膚水後襯堍面仲係濕潤未乾晒時即刻搽精華，咁會吸收得好D。至於幾款精華既使用次序，偏水質既一般會用先，偏潤身或油性既就最後用，肌膚會吸得好D暢順D。除左用精華質地分先後次序外，仲要考慮埋佢既功能，補濕功能既精華一定要搽先，之後再用美白、抗氧等功能性精華，因美白產品一定要有水分先發揮到其功能，所以一定要做左補濕先，如果唔係就晒左。至於精華每次既用量係咪搽多D好D？答案係「否」，每個人既皮膚吸收力同承受力都唔一樣，唔係你搽幾多皮膚都可以吸受晒，適量即可，以免造成浪費。總括黎講，精華唔係多就一定好，最緊要「啱」同「適量」，要考慮自身需要、皮膚狀態、季節等因素去調整使用既精華類型，除非你好似我咁幸運搵到枝萬用既精華XD
