係今次旅行於小倉食過既唯一一間餐廳，就係呢間係tabelog高達3.58分既京壽司啦！佢既分店基本上都係集中於北九州，主力提供性價比超高的回轉壽司，大部分都係120Yen一碟，絕對係廉遊北九州人士的恩物呀！ 點擊圖片放大 位於小倉的這間分店，座位並唔係好多，入到去既時候以為有兩層就好快有位，點知其實只係得地下嗰層先係有得食壽司，店員安排上去嗰層其實只係等候區，有提供熱茶和榻榻米畀顧客坐住等（要除鞋），算係幾貼心。大約等左半個鐘就被職員叫返落去安排入座，座位真係一眼望哂得十幾個。 點擊圖片放大 睇下張menu，當中有7成的壽司都是120Yen一碟，一些較高級的食材就當然係貴啲啦，由360Yen到840Yen不等，例如最貴既係高級海膽840Yen，豐儉由人。雖然呢到冇中文同英文餐牌，不過就看圖識字啦，落單要自己手寫要咩壽司，最右手邊嗰行係要唔要wasabi，入即係要而另一個即係唔要。 兩個人總共叫左13款食物唔算好多，但已經食到肚都漲埋先行出餐廳門口。首推穴子壽司（600Yen），齋睇賣相就知唔講得笑，足足有差不多成隻前臂咁長，份量十足，而且入口即溶魚油味重，醬油配合穴子香烤味，見到都流哂口水。再來就係唔知咩魚，我唔係太鍾意有塊紫蘇葉夾住，紫蘇葉既味唔係好受得住，但魚肉肉質淋得來帶點爽口，又唔會好腥，冇塊葉既話會幾好食。仲有叫左個蒸水蛋，發覺無論係香港日式食店定日本的餐廳，到到食既其實分別好像也不太大，蛋是蒸得好滑，材料好充足，有冬菇、雜綿海鮮係入面，好食是好食但就唔會話好有特色。 點擊圖片放大 兩款海膽都叫哂，一款是240Yen兩件，另一款就係貴兩倍，上面提過那碟840Yen的，但絕對係要點貴一點的海膽，淨係睇賣相都見到爭九條街！兩者食落口係一念天堂一念地獄，貴嗰款食落一流，入口甘甜香醇，after taste強；平嗰款又苦又腥，食落去仲好削，寧願慳返240Yen！另外仲有蟹腳（480Yen），咬落去係一絲絲蟹肉，爽口新鮮鮮甜，必叫！ 點擊圖片放大 之後係三款120Yen壽司，瀨尿蝦壽司食落幾新鮮但唔會話印象特別深刻；飛魚子軍艦亦係一般貨色；至於淨返嗰碟係類似蟹柳沙律咁，唔算差亦唔算好，不過呢三碟都只係120Yen，所以也沒有什麼特別要求，以佢地質素來說係絕對對得起嗰價錢。 點擊圖片放大 另外幾款係240Yen一碟，有熟既大海蝦，肉質彈牙又爽甜；帆立貝，新鮮爽口肉質厚，叫多幾碟都唔會肉痛；三文魚子入口爆開好新鮮，係份量少左點同有我討厭的紫蘇葉。最後一碟係我覺得成餐最伏既壽司，要480Yen一碟的活貝類壽司，一上枱嗰陣覺得嗰樣都幾核突，見到唔算開胃，滴點檸檬汁上去嗰陣，佢仲乸下乸下咁郁，十足異形咁款～以為佢賣相唔討好但會有內涵，一放入口就知道係太天真啦，舊野咬落去又硬又唔爽口，每一啖都好似係雞軟骨硬十倍咁，味道就冇乜而且帶點腥，完全唔知自己食緊乜，仲要成480Yen，係成餐最不知所謂的壽司。 點擊圖片放大 +2 雖然作為結尾的壽司令人有點失望，但整體上來說，壽司的水準和價錢綜合來睇的話，絕對係物有所值。來到北九州有時間的話，可以去試一下這性價比十足的回轉壽司哦。 推薦指數：★★★★ 抵吃指數：★★★★ 地址：福岡県北九州市小倉北区京町 2-6-5 營業時間：11:00-23:00 網址：http://kyousushi.co.jp/ 「立」即去旅遊已經係Facebook開左專頁和Instagram啦！ IG：lapstravel https://www.facebook.com/lapstravel/
