雖然本人唔係專業食評家,但我真的很喜歡吃班戟,尤其近年來無論係日本定香港都吹起陣陣梳乎厘班戟熱潮, 班戟店之多真係令人花多眼亂,去日本旅行的話,始終不能夠間間都試到,而且間間都係人龍店,所以目標都係一間起兩間止;而係香港,雖然可以每日都去唔同店到試,但都一樣係間間人多。所以今次希望分享下自己對這些班戟店的主觀食後感(始終人人口味不一樣),至於有冇參考價值,就由大家自行評價。我主要都係由味道、價錢、賣相、抵唔抵食等等因素去決定,先會介紹日本的,再介紹香港,並由我心目中最好的逐一順序介紹。 日本 (1)大江之鄉自然牧場Oenosato Resort 食後感:原味pancake上枱時的香氣已經令人覺得流晒口水,和現時流行的疏乎厘pancake不同,佢屬於傳統類型那一種,只不過佢又可以做到近乎疏乎厘的質感,唔會太乾而有濕潤感,最重要係雞蛋味真係好重好濃郁!能夠做到咁出色,因為這裡的pancake和平時的pancake做法是有點不一樣的,pancake完全沒有落發粉和任何添加劑,只夠雞蛋來澎漲,加上嚴選的材料如鳥取的牛奶、牛油及北海道的忌廉等,經過反覆研究比例,終於炮製出這份咁好味的pancake!配埋牛油和來自加拿大的楓糖漿,pancake的香味完全引發出來,個人覺得真的好好吃,超過了本人暫時最愛的幸福pancake,可惜就是沒有幸福pancake咁多分店咁方便,有機會來的話,pancake迷千萬不要錯過! 至於期間限定的士多啤梨pancake,賣相好精緻,上面一堆士多啤梨蓉效果好像蒙布朗,內裡加上雪糕,再配多球士多啤梨雪葩,士多啤梨略為微酸,而且個人覺得士多啤梨味很突出,以致蓋過了pancake本身的蛋香味,有一點可惜,這pancake最出色的就是佢的蛋味濃,現在有點功高蓋主的感覺,不過雪葩倒是幾好吃,但如果想吃出pancake的最出色的表現,就記得要原味了,吃多份也嫌不夠喉呀! 味道:★★★★★ 價錢:★★★★★ 賣相:★★★★★ 款式:★★★★★ 抵食度:★★★★★ 是次輪候時間:約30分鐘 網址:https://www.oenosato.com/resorts/ (2)幸せのパンケーキ 食後感:本人心目中No.2!望落去和食落去都係梳乎厘質感既pancake,招牌作係原味pancake配蜂蜜打成的牛油和焦糖糖漿。上枱望住以為份量好大,但吃落去其實係超輕盈!完全近乎係食緊梳乎厘之餘,又保留到pancake應有的口感,而且仲充滿著蛋香味!每一口也是軟綿綿的棉花口感!吃畢三塊都不覺得膩!而最最最畫龍點睛之處,就係pancake上面嗰一球類似薯蓉既物體,佢就係由蜂蜜打成既自家製牛油,搽上每一片上面,是蜂蜜香和牛油香味並存,同輕盈既pancake絕對係天作之合,完全忘記了所帶來的卡路里,幸福感直線上升,再加埋糖漿,簡直係味蕾天堂。一份為港幣8-9x,但味道和價錢絕對成正比,款式選擇都幾多,有些分店更有限定口味,例如京都店就有抹茶味。另外佢亦提供星期一至五非繁忙時段網上訂座服務,簡單方便,大大減低需要排隊時間。 2017.11.16更新:間限定的南瓜口味,賣相非常吸引,尤其是那些南瓜汁望落去感覺好smooth,食落去南瓜味都幾濃,再加上南瓜籽脆脆的口感和pancake的軟身形成對比感,令口感豐富了,不過我不是太喜歡紅色一粒粒嗰啲,食落係脆但係太香,感覺有點奇怪,雖然佢令賣相好看左;而上面像薯蓉嗰球,其實都係蜂蜜牛油來,不過就加左提子乾,我本身幾抗拒食提子乾的,但佢混入左落蜂蜜牛油到我又接受到;另外仲有一堆好強奶脂味的忌廉,口感很滑;不過可能又有甜既南瓜汁、提子乾蜂蜜牛油和忌廉再加上pancake,個人覺得偏甜左,食落會有點膩,平衡感較原味稍遜,除非很偏好食勁甜,否則原味其實較南瓜味出色的。 味道:★★★★★ 價錢:★★★★ 賣相:★★★★★ 款式:★★★★★ 抵食度:★★★★★ 是次輪候時間:約40分鐘 網址:http://magia.tokyo/ (3)Bills 食後感:基本上皇牌Pancake得一款,就係Ricotta hotcakes配上香蕉、蜂蜜牛油,上面的蜂蜜牛油因為下面pancakes的熱力而溶得好快,影左一下相已經溶左一半,要影相就爭取時間。跟住就落楓蜜啦,pancakes本身味道帶著微微蛋香和芝士味,食落去口感更係不得了,就像梳乎厘般鬆軟綿密,因為製作過程謹慎,所以對打入去的空氣控制做得好仔細,加上煎的功夫高超,口感才為做到面香內濕潤。相較幸せのパンケーキ的pancake,口感稍為重返少少,蜂蜜牛油味冇咁出,pancake款式亦只得一種(因為主打食各類早餐食品),而且分店亦比較少,大阪到今年才有分店,方便程度稍遜,令整體分數略減。 味道:★★★★☆ 價錢:★★★ 賣相:★★★★★ 款式:★★★ 抵食度:★★★★ 是次輪候時間:約20分鐘 網址:http://billsjapan.com/jp (4)J.S. Pancake Cafe 點擊圖片放大 食後感:三層的pancakes疊起來,上層有士多啤梨醬、吉士醬、雲呢拿雪糕、一大球忌廉、開心果碎,還有很多新鮮的士多啤梨!成個pancake口感好豐富,有凍有熱有軟有脆有酸有甜,忌廉奶脂味香醇特出,pancake口感好柔軟,是平時傳統派pancake的upgrade版本,帶少少煙韌好好食,微酸的士多啤梨醬和甜甜的吉士醬、雪糕互相平衡,加埋開心果香濃的味道,食完令人超滿足! 至於另一款的classic pancake,可以食到pancake原原本本的味道和口感,切開望望就可以見到幾鬆軟,食落充滿蛋香,加埋楓糖漿和牛油吃,和士多啤梨那個吃到的是截然不同的感覺,兩者各有千秋。 味道:★★★★ 價錢:★★★☆ 賣相:★★★★ 款式:★★★★ 抵食度:★★★★ 是次輪候時間:0 網址:http://pancake.journal-standard.jp/ (5)Café Kaila 點擊圖片放大 食後感:曾經在原宿區拿下第九名,又拿下了2014年的甜品金賞,雖然佢唔係提供梳乎厘班戟,但佢賣相就係非常之咁好呃like。是次共點了兩款pancakes:招牌雜果和蘋果香蕉,一上桌,色彩豐富看著就已經開心,而且份量非常多。一吃下去,pancakes很軟熟又充滿著蛋香,配合軟滑的忌廉、香軟的芝士、特別炮製的水果(糖水煮的蘋果很好吃)還有令人不能抵抗的楓糖醬,真的是把心也軟化了。美中不足係佢冇咩分店,變相令等待時間好長,款式都幾多,不過都只係所配的水果不同,而且佢唔似梳乎厘班戟咁輕身,所以食完係好飽好滯,但份量咁大真係好抵食。 味道:★★★★ 價錢:★★★ 賣相:★★★★★ 款式:★★★★★ 抵食度:★★★★ 是次輪候時間:約1小時 網址:http://cafe-kaila.com/ (6)Honolulu Coffee 食後感:這間店本身就像平時starbucks那種連鎖咖啡店一樣四圍都有,都唔使點樣book同等位。它這款pancake不像前面那些這麼大堆頭,沒有豐富的生果,就只有上層那一堆流質狀的類似cream一樣的蓋著pancakes。但就不要小看這看似平平無奇的Pancakes,雖然pancakes本身不是那一種很香軟的感覺帶少少乾身,但那白色的漿汁是這pancakes的靈魂來,充滿著濃烈的椰子香和vanilla香的味道,甜得來很有層次,每一口也包蓋著溫醇,較乾身的pancakes汲收著口感幼滑的漿汁,變得非常豐盈美味。所以不要以為它是連鎖cafe的出品就忽略佢,佢絕對係滄海遺珠來的。 味道:★★★☆ 價錢:★★★★★ 賣相:★★ 款式:★★★★ 抵食度:★★★★★ 是次輪候時間:0 網址:http://www.honolulucoffee.com/ (7)Eggs’n Things 食後感:又一賣相非常吸引和呃like的pancake,Pancakes上有大量的鮮忌廉和水果,而今次點的是士多啤梨味。不要看它這樣子的份量,其實那些忌廉吃起來很輕盈,而且一上枱就要趕快影相,因為影了相不久,忌廉便開始慢慢地斜下來,應該是新鮮製作的原因。吃起來pancakes薄身但非常鬆軟,另外亦有三款糖漿可以灑上pancakes的,例如基本的楓糖、椰子糖槳和草莓糖漿,視乎個人喜好。整體而言質素較為平均,賣相係亮點,不過分店多亦不用排隊,而且開得幾早,適合各類不鍾意排隊人士。 味道:★★★ 價錢:★★★ 賣相:★★★★ 款式:★★★★ 抵食度:★★★ 是次輪候時間:0 網址:http://www.eggsnthingsjapan.com/ (8) キャンベル · アーリー(Campbell Early) 食後感:整碟用上4粒甜王士多啤梨,pancake伴以淡雲尼拿忌廉醬。Pancake吃下去帶少少煙韌,但唔夠之前在日本其他地方食到既咁驚喜,似係麥當勞既升級版,基本上係靠士多啤梨和忌廉醬去提升返個pancake既味道,味道畀分既話係一般多少少,及不上賣相 味道:★★☆ 價錢:★★★ 賣相:★★★★☆ 款式:★★★☆ 抵食度:★★★ 是次輪候時間:0 網址:https://r.gnavi.co.jp/fa84614/ (9)雪ノ下工房 點擊圖片放大 食後感:東京和大阪都有分店,每一個pancake也是即製的,起碼要等20分鐘以上,叫左3款,分別是香蕉味、抹茶和蕃薯。望落去和咬下去的感覺確實不太像pancake,反而像蛋糕一樣,帶點濕潤,有點像港式雞蛋仔的有嚼勁的口感,味道來說是抹茶最好,茶香很濃郁,配合紅豆很夾,蕃薯第二好吃,香蕉沒什麼特別。整體來說是好吃,但味道驚喜上不太大,而且等得比較耐,屬見仁見智系列。 味道:★★ 價錢:★★★★★ 賣相:★★★★★ 款式:★★★★ 抵食度:★★★ 是次輪候時間:約50分鐘 網址:http://yukinositaqs.net/ 香港 (1)Pan de Pain Pancakes & Sweets 點擊圖片放大 食後感:雖然佢有好多款pancakes,但真係梳乎厘pancake就只係得一款($68),內裡座位都算多,不過都見到有人陸續排隊,差不多枱枱都係叫呢款pancake,大約等左20分鐘左右上枱。望落去賣相很輕身,食落蛋味幾香,口感和日本吃到的也有7成似,但佢唔屬於梳乎厘嗰種輕身,反倒有幾分像半熟那種感覺,所以入面比較濕潤,伴碟忌廉我覺得加不加分別不大,糖漿亦係大路款式,不夠有自家製感覺,而且得2塊,略嫌有點唔夠喉,但整體水準上係中上以上,係喺香港止pancake之選之一。 味道:★★★★ 價錢:★★★★ 賣相:★★★★ 款式:★★★ 抵食度:★★★★ 是次輪候時間:0 地址:尖沙咀河內道18號K11購物藝術館B1樓B111B號舖 (2)am.pm 食後感:屬於街頭小食店,將梳乎厘pancake進一步街坊化,所以係冇座位慢慢食的。雖然唔屬於食落好輕盈,比較軟綿綿,賣相唔係算討好,但價錢有絕對優勢,以$28的質素來說是沒有什麼可以挑剔的了,本身沒有很大期望但反而有點驚喜,不至於好好食,但對得住個價位,唯款式得一款,不過可以另外牛奶軟雪糕。 味道:★★★ 價錢:★★★★★ 賣相:★★ 款式:★ 抵食度:★★★★★ 是次輪候時間:約5分鐘 地址:油麻地彌敦道560譽發廣場地下B舖 (3)Flipper’s 點擊圖片放大 食後感:貴為日本過江龍,價錢不菲,加上成日排長龍和媒體大肆報導,自然令人有所期待,可惜有期望就自然有失望。一共試左2款pancakes,包括係招牌原味梳乎厘pancake以及榛子朱古力焦糖香蕉pancake,全部也是即叫即整,所以也等左20分鐘左右,pancake聲稱選用來自日本農場的新鮮雞蛋、天然奶油及無添加麵粉知唔知道,每份pancake都係一碟三塊,基本上唔同嘅味道,pancake都係一樣,不同的只是配料和醬汁不同。賣相望落去也軟綿綿,食落去有啲失望,口感上尚算輕盈,但空氣感唔夠強,比較實左少少,而且蛋香味唔夠濃,原味還好一點,忌廉的奶脂味比較強可以彌補蛋味不足問題,但榛子朱古力味道強烈到蓋哂pancake既蛋味,加上pancake索左啲醬令口感變重,變相食完之後變得好飽肚,梳乎厘口感不重。個人覺得價錢和質素唔成正比,水準唔穩定以及名氣過譽係導致大量失分主因,可幸係可先到店舖拎定指定時間的籌而免卻排隊之苦。 味道:★★★ 價錢:★ 賣相:★★★★★ 款式:★★★ 抵食度:★ 是次輪候時間:0 地址:銅鑼灣軒尼斯道500號希慎廣場6樓i.t blue block (4)Whitewood Coffee 食後感:叫左兩款,一是原味,另一是朱古力榛子香蕉,雖然食落都算輕身,但首先賣相唔好,尤其用包裝牛油上碟,加上每個形狀參差不齊,有些略嫌凹陷塌左,而配料各方面冇咩誠意,味道尚有蛋香。但終極致命傷係服務混亂,雖然事次已知會要等40分鐘左右,但結果係比預期等多左20分鐘,佢係去收銀落order再等食物送上枱,但佢冇畀收據亦冇畀牌,而食客係自己揀位,所以落單後食物屬於邊張枱,係全憑收銀人腦去記,但當日都full house,以致眼見係比我枱遲入座起碼20分鐘的食客,竟然還先上枱,然後是我的pancake上錯了給其他食客,所以再收返入去,結果過了10分鐘後先拎返這碟pancake給我,所以個pancake都等到塌左,服務如此混亂,需要有大大改善空間。 味道:★★★ 價錢:★★★ 賣相:★ 款式:★★ 抵食度:★★★ 是次輪候時間:約1小時10分鐘 地址:沙田石門安群街3號京瑞廣場一期2樓207號舖 「立」即去旅遊已經係Facebook開左專頁喇! 歡迎大家去比個like丫! https://www.facebook.com/lapstravel/