俺のフレンチ係俺の集團其下的食店,俺の即係我的而後面既係代表不同即菜色,我今次介紹同幫襯的是法國菜,佢仲有意大利菜、西班牙菜、日本菜、燒肉等等,甚至香港都有分店(香港嗰間暫時係主打日本菜)。佢係一間超級人龍店,基本上walk-in的話,有位機會是很微,所以勸予各位想食的話記得先上網訂座(要填電話地址我通常填當地下住的酒店)。 佢提供既係以米芝蓮級數但非常平實既價錢予客人去享用優質既美食。很多家分店都是以「立食」為主,因為可以縮短客人用餐時間從而每人做多幾轉,咁價錢先會平。不過很多分店是有坐位的,但要付多少少費用,而我今次光顧位於銀座的這間更設有現場音樂表演,當然要再額外付表演費啦,但環境就高級了好多。 因為驚唔識點菜,我預先上官網睇下menu再翻譯再先,因為佢每間分店menu都會唔同。另外,每人點一杯飲品是這裡的規定。坐低冇幾耐,就即刻送上了兩個小食,望落去似係麵包,但食落去口感似泡芙,中間既醬係類似白汁咁。雖然食落唔知係咩,但味道就好好,令我對之後既美食好期待,第一印象很深刻。 然後兩份前菜率先上枱,分別係一款凍湯同賣相非常精緻的海鮮小食。首先係矜貴既凍湯,將湯雪成啫喱狀,內裡有海鮮包括龍蝦、帶子、鮑魚、海膽,上面鋪上魚子醬同金萡,最底係慕絲,每一啖既口感都好豐富,就好似一個濃縮的海洋,海鮮的鮮甜味在口中爆發,賣相味道並重。之後另一款前菜上枱更係「嘩」左一聲,四圍的沙律菜和三文魚子不是重點,中間那條狀的其實是三文魚卷住海膽打成的慕絲,兩者配合得天衣無逢,而神來之筆更係上面那塊網狀的東西,嗰塊其實係紫菜造成的,整塊是脆身的,配上三文魚海膽卷一脆一軟,絕對唔只係呃like之作。 之後到2款主菜,芝士焗龍蝦同煙薰牛扒。龍蝦味非常濃郁而且啖啖肉,個人覺得比之前食過的龍蝦包出色。牛扒上枱時視覺效果非常震撼,佢有個透明既盒入住,盒裡面係注滿哂煙,上枱既時候先拎走個盒,煙就即刻四散。佢附有7種調味料來點塊牛扒,不過我並唔係每一款都覺得啱食,因為有些香料味好重。牛扒就唔夠淋,對我黎講生左少少。伴碟既係蕃薯條,黑色既係黑松露粉,食落味道唔錯。整體來說龍蝦出色過牛扒,但視覺上則牛扒優勝。 既然成餐都咁優質,所以決定叫多2樣甜品為呢餐劃上完美句號。第一樣係血橙焦糖香蕉班戟配雲尼拿雪糕,血橙醬酸酸甜甜好開胃,亦中和左上面焦糖香蕉既甜膩感,配埋班戟一齊食,成道甜品都昇華起來。第二樣係焦糖布甸配開心果雪糕,唔好以為係普通布甸,佢其實係南瓜布甸來,個布甸很滑而且南瓜味很濃烈,南瓜迷最愛,加上自家制既開心果雪糕配上開心果,兩者配上送上秋天的味道。 咁超班既晚餐,一份full course配埋現場音樂演奏,氣氛環境美食都係一流,但價錢加埋計返港幣都只係400蚊以下!!!去邊到搵呀! 推薦指數:★★★★☆ 抵吃指數:★★★★☆ 地址:東京都中央区銀座1-8-19「KIRARITO GINZA」地下1階 營業時間: 一至五12:00-15:00/17:00-23:00 六、日、假期12:00-23:00 網址:http://www.oreno.co.jp/